MLA-in lung lumna hmun a tlawh

Aizawl North-III bialtu MLA K Sapdanga, minister chuan nimin zing khan Chanmari-Chaltlang inkar kawnga waiting shed bul aṭanga June 10, Nilainia a bial chhung Chanmari West leh Edenthar Veng inrina luikawra lung tawlhna leh lumna hmun a tlawh.

K Sapdanga chuan, DC office aṭanga hmalaknate a theih ang anga lo ṭawiawm a tul thu sawiin, "Sorkar anga tih tur ṭul awm apiang a theih anga tih zel a ni ang," a ti a; lung lumna luikawr bulhnaia chengte leh kawnga kea kalte tan fimkhur a ṭul thu a sawi.

Lung lum avang hian Chanmari West aṭanga Edenthar Veng panna kawng chu lirthei kal theih lohin a awm mek a; lung lum leh mai thei a la awm nual avangin kawng hi lirthei kal theiha siam ngam a ni rih lo.

DC office-a official-te chuan June 10 khan lung lumna hmun an enfiah nghal a, lung lum leh mai theia ngaihte ven nan nimin khan JCB hmanga then tuma hmalak a ni. Kawng tlang hun tur erawh sawi lâwk theih a ni lo.

Aizawl North-III Bialtu MLA hi bialtu corporator H Lalremtluanga, Aizawl mayor-in a ṭawiawm a ni.