Mizoramah Green Mizoram Day hman a ni

Nimin khan Mizoram hmun hrang hrangah Green Mizoram Day hman a ni a, thing eng emaw zat phun a nih bakah, kum hmasa lama thing phun tawhte hung ṭhat a ni.

Green Mizoram Day (GMD)-ah hian larsap Gen. Dr Vijay Kumar Singh chuan Lok Bhavan huam chhungah Mizoram state tree 'Herhse' a phun a; Governor Secretariat-a thawkte bakah, Environment, Forests & Climate Change department-a officer ṭhenkhat an tel.

Gen. VK Singh chuan, GMD puala thingphun rûnpui kum tina buatsaih ṭhin chu ṭha a tih thu sawiin, Mizoramin hmun hring leh thing leh mau a neih ṭhat rih thu a sawi a, "Hengte hi Mizoram sik leh sa tinuam a, boruak tithianghlim a, ruahtui tlak dan thlenga danglamna thlentu an ni a, sik leh sa inthlak danglam zel tur ven nan kan humhalh a ṭul a ni," a ti.

Larsap chuan, GMD-ah chauh ni lo, thing phun hun chhungin a tam thei ang ber phun turin mipui a chah a; GMD hmangtute chu thing ṭiak phunah tawp mai lo a, thing phunte an puitlin ngei theih nan enkawl zui turin a chah bawk.

Siahaah chuan MADC Forest Hall-ah GMD hman a ni a, MADC-a Forest changtu executive member Tiahlei Syuhlo khuallian a ni. Inkhawm zawhah Mizoram sorkar leh MADC-a department hrang hrangte'n Siaha daiah thing ṭiak eng emaw zat an phun.

Kumina kângmei véng ṭha khuate hnenah lawmman hlan a ni a; Tokalo chu pakhatna niin, Amotlah leh Tisi khuate pahnihna leh pathumna an ni. 'Best Media in Fire Prevention Award' sem a ni bawk a, pakhatna Kawleng, pahnihna Moonlight leh pathumna Maraland te an ni.

Champhaiah chuan bawrhsap Mohammad Aaquib hoin Zote Sikpui Rûnah GMD hman a ni a, Zote leh Ṭiau lui inkar kawng dungah sorkar department mite leh tlawmngai pawlte'n thing eng emaw zat an phun.

Kângmei vêng ṭha khua thlante hnenah lawmman hlan a ni a; pakhatna Dungtlang, pahnihna Dilkawn leh pathumna Zawlsei khuate an ni a; Hmunhmelṭha, Tualchang leh Sazêp khuate hnenah consolation prize hlan a ni bawk.

Serchhipah chuan GMD pualin Serchhip DC Pisapui Hall-ah inkhawm buatsaih a ni a, bawrhsap Paul L Khuma'n kumina kângmei vennaa thawk ṭhate hnenah lawmman a hlan. Inkhawm zahah Kikâwn leh Keiṭum inkar kawngpui kamah thing ṭiak eng emaw zat phun a ni.

Serchhip district-a kumina kângmei veng ṭha ber khua chu Léng a ni a, East Lungdar leh Chhingchhip Mualpui te pahnihna leh pathumna an ni. YMA branch chanchinbu, kângmei venna thu chhuah ṭhate hnenah lawmman hlan a ni bawk.

Lawngtlaiah chuan bawrhsap Donny Lalruatsanga leh LADC chief executive member C Lalsawmzuala te hoin DC pisa tualah GMD hman a ni a, inkhawm zawhah Sihtlangpui leh Kawlchaw inkar kawngpui kamah thing ṭiak 420 phun a ni.

Kumina Lawngtlai district-a kângmei veng ṭha khuate hnenah lawmman hlan a ni a; pakhatna Rúlkual, pahnihna Siachangkawn leh pathumna Diltlang South te an ni. Thaltlang, Lawngtlai Vengpui leh Chawnhu te hnenah consolation prize hlan a ni bawk.

Mamitah pawh bawrhsap Suvigya S Chandra hoin LAD Park-ah GMD hman a ni a, thing ṭiak phun a ni. Kum hmasaa thing phun tawhte bul vel sam fai a nih bakah, a nung zo lote chu thlak a ni a, thing ṭiak 150 vel phun belh a ni.

Kumina Mamit district-a kângmei veng ṭha khuate hnenah lawmman hlan a ni a; pakhatna Mamit Bazar Veng, pahnihna New West Phaileng leh pathumna Marpara Mizo Veng an ni. Chungtlang, Nghalchawm leh South Sabual ten consolation prize Rs 10,000 ṭheuh an dawng bawk.

Saitualah chuan GMD pualin Keifang Venghlun YMA Zawlbukah inkhawm tawi buatsaih a ni a, kangmei veng ṭha khuate hnenah lawmman sem a ni. Kângmei veng ṭhate chu pakhatna Saitual VC-I, pahnihna Vanbawng VC leh pathumna Changzawl YMA an ni a; kangmei ven chungchang inzirtirna lemziak intihsiak lawmman sem a ni bawk.

Kumin GMD pualin Saituala EFCC department-in thing ṭiak 2,700 an sem chhuak. Zirna-inte'n an remchan danin thing phun hnatlang an nei a, YMA Sub-Hqrs chuan Rosangi Memorial Park-ah thing eng emaw zat an phun bakah, kum hmasaa kawng dunga thing an phunna hmunte an tifai a ni.

Khawzawlah chuan GMD pualin DC Confernce Hall-ah inkhawm buatsaih a ni a, bawrhsap K Vanlalṭhiana'n a hmanpui. Kângmei ven ṭha khuate hnenah lawmman sem a ni a; pakhatma Lungtan pahnihna Tualte leh pathumna Rabung niin, Chalráng, Chhawrtui leh Kawlkulh North ten consolation prize an dawng.

Inkhawm zawhah Tuisen phai leh Tuichang inkar NH-6 kawngpui kamah thing phun hnatlang huaihawt niin, sorkar pisaa hrang hranga mi te, pawl aiawhte leh Khawzawl HSS zirlaite telin, thing 546 an phun a ni.

Hnahthialah chuan Hnahthial By-Pass Road-ah GMD pualin bawrhsap K Vanlalruati hoin hun hman a ni a, Hnahthial district-a sorkar pisa hrang hranga thawkte leh pawl hrang hrangte'n thing ṭiak 285 an phun. Hnahthialah hian GMD pualin YMA Sub-Hrs, MHIP, MUP, MJA, VC Association leh Hnahthial Officers' Club ten thing phun hnatlang an nei bawk.

District huapa kângmei veng ṭha ber khua lawmman hi pakhatna Rs 75,000, pahnihna Rs 50,000 leh pathumna Rs 40,000 a ni a, consolation prize dawngtute hnenah Rs 10,000 zel pek a ni.

Mizoram State Legal Services Authority (MSLSA) pawhin GMD pualin Gauhati High Court pisa pêng, MINECO-ah GMD an hmang a, Gauhati High Court chief justice Justice Ashutosh Kumar leh judge Justice Michael Zothankhuma te hoin thing an phun. MSLSA member secretary Vincent Lalrokima leh thawktu dang te, Mizoram Judicial Service officer te, Law & Judicial department officer te, Gauhati HC Aizawl Bench-a thawk te, Mizoram Bar Association member-te leh Mizoram Law College zirlaite an tel bawk.