Aizawl dist-a mi 2,91,390 hnenah SIR enumeration form pe tawh

Aizawl district election officer Lalhriatpuia, bawrhsap chuan nimin khan DC Pisapui Hall-ah thuthar thehdarhtute a kâwm a; Electoral Roll Special Intensive Revision (SIR) 2026 neih mekah Aizawl district-ah enumeration form 2,91,390 pek chhuah a nih tawh a, chung zinga 47.34% chu lak khawma digitise a nih tawh thu a sawi.

Lalhriatpuia chuan, SIR 2026 chu India khua leh tui dik tak, vote nei thei chinte hmaih awm loa electoral roll-a thun vekna tur a nih thu a sawi a, "SIR-a voter inziak lut turte chu India khua leh tui dik tak, July 1, 2026-a kum 18 tling chin, Assembly constituency chhunga cheng leh Parliament-in dan a siam anga voter ni thei ngei an ni tur a ni," a ti.

Aizawl DEO tarlan danin, SIR 2026 buaipui mekah hian nimin thleng khan Aizawl district-ah chuan voter 2,92,635 zinga 2,91,390 hnenah enumeration form pek a ni tawh a; form pek chhuah tawh zinga 47.34% chu lak khawma digitise tawh a ni.

Aizawl district mipuite chu hun tiam chhunga eneumeration form buaipui ṭheuh tur leh BLO/election lama thawktute ṭha taka ṭawiawm tura ngenin Lalhriatpuia chuan, "Democracy chak leh dik, electoral roll felfai kan neihna turin kan pawimawh em em a ni," a ti a; hriat chian duh nei tan DEO office leh Electoral Registration Officer pisa tinah helpdesk siam a nih thu a sawi.

Aizawl Bawrhsap chuan, BLO-te'n in tinah kalin enumeration form sem leh khawn hna an thawh mek thu sawiin, "June 28, 2026 thleng neih a ni dawn a, mahni veng/khuaa awm remchang lote chuan voters.eci.gov.in aṭangin online-in form an thehlut thei. Draft electoral roll chhuah hnuah electoral roll-a luh thar, siamṭhat, insawn leh thil dangte dil theih a ni ang," a ti. Voter-te'n voters.eci.gov.in hmangin SIR hnuhnung ber (SIR 2005) an en theih thu a sawi bawk.