Kum kal ta chhungin ṭhalai 26,500-te skill training hrang hrang pek a ni - CM

Chief minister Lalduhoma chuan, Mizoramin full literacy-ah duhtâwk mai loin, digital literacy, financial literacy leh skills & entrepreneur lamah hma a lak mek thu leh, sorkar kum kal ta chhung khan Mizoram ṭhalai 26,500-te kutthemthiamna (skill) training chi hrang hrang pek an nih thu a sawi.

CM Lalduhoma hian June 11, Ningani khan Rashtrapati Bhavan Cultural Centre, Delhi-a NITI Aayog Governing Council vawi 11-naah thu a sawi a; Mizoram chu India rama ziak leh chhiar thiam vekna, fully literate state hmasa ber a nih thu sawiin, "Full literacy-ah hian kan duhtâwk mai lo a, digital literacy lamah te, financial literacy-ah te, skills & entrepreneur-ahte ṭan kan la zui zel a, kan ṭhalaite hi tunlai thiamna sang zel mila hna thawk thei turin kan buatsaih," a ti.

Mizoram sorkarin ṭhalaite chu EV maintenance, drone technology, artificial intelligence leh solar technology thlengin training an neihpui thu sawiin Lalduhoma chuan, "Sorkar kum kal ta chhung khan ṭhalai 26,500-te chu skill training chi hrang hrang kan pe a, an zinga 72% aia tam mahin hna an hmu. India Skills Northeast Regional Competition 2025-26 ah champion state kan ni," a ti a; Human Development Index-ah Mizoram a ṭhan chak thu leh, hmarchhak biala District Sustainable Development Index report-ah Mizorama district zawng zawng hmahruaitu (front runner) an nih vek thu a sawi.

Chief Minister chuan, Viksit Bharat 2047 milin Transformed Mizoram 2047 kalpui a nih thu a sawi a, "Kum 2047-ah Mizoram chuan India ram GDP-ah 1% lo thawh ve theih kan tum. Chief Minister’s Innovation Challenge kan kalpui a, sorkar department te, tlawmngai pawl te, college leh grassroot thlengin an tel a, start-up leh kutkawih eizawnna bul ṭan chho mekte thawhpuina tur Mizoram Handholding Venture Capital Fund kan siam a ni," a ti.

Lalduhoma chuan, Prime Minister ngenna angin leihriak (oil & gas) renchem kawngah Mizoram sorkarin theihtawp a chhuah thu sawiin, "Chawlhkar tin Nilaini apiangin 'No Official Vehicle Day' kan kalpui a, VIP convoy tihtlem a ni," a ti a; mipuite kea kal uar tur leh public transport hmang uar tura zirtir an nih thu a sawi.

Chief Minister chuan, Digital lama hmasawn chu an ngaih pawimawh ber zinga mi a nih thu a sawi a, "Tunah hian hmarchhak biala telecom network nei ṭha ber zinga mi kan ni a, kan tele-density pawh 112 a ni. E-office kan kalpui tawh a, land record kan digitised chho mek a, mipui hnenah digital service langtlang takin pek ṭan mek a ni," a ti.