Minister leh MLA-te'n Mualkhang Gas Bottling Plant tihlen an tlawh

Minister K Sapdanga, deputy speaker Lalfamkima, Food, Civil Supplies & Consumer Affairs minister B Lalchhanzova, adviser to CM Lalmuanpuia Punte, MLA K Laldawngliana leh Lt Col. Clement Lalhmingthanga te chuan nimin khan Mualkhang Gas Bottling Plant din thar leh mek an tlawh a; Indian Oil Corporation Limited deputy general Z Lhungdim-a'n an dinhmun a lo hrilh.

FCSCA minister B Lalchhanzova chuan, Mualkhang Gas Bottling Plant tihlen mekah chak taka hna thawh a nih thu a sawi a, "Ram lak belh leh forest clearance lam kan ûm rei deuh. He hmun hi Mizoram tan a ṭangkai hle dawn a, ramri-ah eng emaw buaina pawh awm se, Mizoram ni 10 daih a thun theih dawn. Ni khatah gas bûr 7,450 vel an thun khat thei dawn a ni," a ti.

IOC Deputy General Manager sawi danin, tunah hian Gas Bottling Plant hmun lei tihzawl mek a nih bakah, Plant huam chin retaining wall-in an hung mek a ni. A hung hna hi 95% vel zawh a ni tawh a, lei tihzawl hna 75% vel zawh tawh niin, July 21, 2026-ah zawh hman an tum. Tui kilolitre 6,000 vel dawng thei zém siam turin tender buaipui mek a ni.

Hna thawh ṭan aṭanga thla 40 chhungin Bottling Plant siam zawh tura tih a ni a, chu chu February 2028 a ni. Minister leh MLA te chuan hun tiam chhunga hna thawk zo hman ngei turin IOC hotute an chah.