AMC roreltu tharte'n sang zawkah Aizawl an hlankai ngei ka beisei - UDPA Minister

Urban Development and Poverty Alleviation (UDPA) minister K Sapdanga chuan June 11, Ningani zan khan Aizawl Sumtualah UDPA department hotute leh Aizawl Municipal Corporation corporator thlan tharte'n zanriah an kilho a hmanpui a; AMC-a roreltu tharte'n Aizawl chu dinhmun sang zawkah an hlankai ngei a beisei thu a sawi.

K Sapdanga chuan, Aizawl enkawlnaah chak taka thawhho zel a ṭul thu sawiin, "State sorkar hmasate leh AMC-a roreltu hmasate'n hma an lakna zarah Aizawlah rorelna mumal a awm chho zel a, AMC-a roreltu tharte'n Aizawl hi inenkawlna felfai leh dinhmun sang zawkah in hlankai ngei ka beisei a ni," a ti.

AMC roreltu tharte leh UDPA department lama thawktute chu ṭha taka thawkho tura chahin Minister chuan, "Taima taka thawhna hian hmasawnna eng emaw tak, lukhâwng nei a thlen ngei ṭhin tih hre chunga tih tak zeta thawh a ṭul. Aizawl khawpui himna tura tui luankawr siam mek Storm Drain Project hi ṭangkai taka kalpui a nih theih nan i thawkho zel ang u," a ti. AMC chu mawhphurhna lian zawk pek zel an duh thu a sawi bawk.

Inkawmhonaah hian Aizawl mayor H Lalremtluanga pawhin thu a sawi a; UDPA secretary K Lalthawmmawia, Aizawl Smart City chief executive officer CC Lalchhuangkima, AMC corporator-te leh UDPA hotu dangte an tel.

Aizawl enkawlna atan ṭangkai zawka Swachh Bharat Mission 2.0 hman dan tur leh Solid Waste Management Rules thar ṭha taka zawm a nih theih nana hmalak tawh dan leh hmachhawpte sawiho a ni.