Apex Bank-in 2025-26 ah vbc 40.39 hlêp

Mizoram Cooperative Apex Bank Ltd. chuan nimin khan Vanapa Hall-ah Annual General Assembly vawi 31-na an hmang a, Cooperation minister PC Vanlalruata'n a hmanpui. MCAB hian financial year 2025-26 chhung khan cheng vbc 40.39 an hlêp.

MCAB chief executive officer A Lallungmuana’n Annual Report 2025-26 a tlangzarha a lan danin, Apex bank hian kum 2025-26 chhung khan deposit cheng vbc 1,929.53 hmuin, cheng vbc 1,272.11 an pe chhuak a, credit deposit ratio 65.93% a ni. Sum che vel zawng zawng vbc 3,201.64 a ni a, cheng vbc 40.39 an hlêp a ni.

Apex Bank hian kum 2025-26 chhungin bank branch thar panga leh ATM booth pathum an hawng a, branch 35 leh ATM booth 44 an nei mek. RBI scheduled bank-ah hlan kai an ni bawk.

Minister PC Vanlalruata chuan, scheduled bank dinhmunah Apex Bank hlan kai a ni chu Mizo mipui tan mellung pawimawh a nih thu a sawi a; Mizoram Cooperative Development Council din a nih thu leh chak zawka cooperative movement kalpui tum a nih thu sawiin, "Ei leh barah te, intodelhnaah te, kut hnathawktute chawikanna kawngahte cooperative movement hian hmun pawimawh tak a chang," a ti.

MCAB General Assembly-ah hian documentary enho a nih bakah, society credit, non-credit, pigmy collector, business correspondent leh branch ti ṭhate hnenah lawmman sem a ni a; chawhnuah rorel a ni.