Flight case tlangzarh, sem nghal

Titan Sound neitu Lalbiakmawia'n sound system dahna báwm (flight case) a siam chu nimin khan Central YMA Hall-ah CYMA president R Lalngheta'n a tlangzarh a, kohhran ṭhalai pawlte hnenah a thlâwnin sem nghal a ni.

CYMA President chuan, Lalbiakmawia’n a kutkawiha sound bungraw dahna báwm a siam chhuak chu chhuanawm a tih thu a sawi a, "Ṭhalaite kutthemthiamna hmanga eizawnna kawng kawhhmuhna ṭha leh entawn tlak a ni. Tunlaiah taimakna leh thawhrimna tel loa awlsam taka sum lak luh tum kan tam a, hei hian ruihhloa sumdawnnaahah a hruai lut bawk. Ruihhlo ngai ṭhalaite hi eizawnna kawng kawhhmuh an ngai a, kutthemthiamna hmanga eizawnna kan kalpui nasat a ṭul a ni," a ti.

Lalbiakmawia pawhin thu sawiin, flight case siam turin a zir kual nasat thu a sawi a; a remchan angin YMA branch leh kohhran ṭhalai pawlah pek zel a tum thu a sawi bawk.

Titan Sound neituin flight case a siamte hi kohhran hrang hrang - Presbyterian Kohhran, Baptist Kohhran, Seventh Day Adventist, Salvation Army, Evangelical Free Church of India, UPC (Mizoram) leh Isua krista Kohhrana ṭhalai pawlte bakah, CYMA, YMA branch pathum leh leh St. Paul’s HSS te hnenah pek a ni.

Flight case inhlanna inkhawmah hian AMC corporator Dr Lalmalsawma Nghaka pawhin thu a sawi a ni.