Central-in Mizorama raltlante tan cheng vbc 10 hû buhfai a pe dawn

Chief minister Lalduhoma chuan June 12, 2026 khan Union Home minister Amit Shah chu New Delhi-a a pisaah a kâwm a; Amit Shah chuan, Mizorama râltlânte chhawmdawl nan Mizoram sorkar hnenah cheng vbc 10 hû buhfai pek a nih tur thu a lo hrilh.

Mizoramah Manipur, Bangladesh leh Myanmar aṭangin raltlan mi 40,000 vel an awm mek thu sawiin Lalduhoma chuan, "State sorkarin heng mite chhawmdawlna tur hian theihtawp a chhuah zel a, sorkar laipui ṭanpuina kan mamawh hle," a ti.

Lalduhoma ngenna chhangin Union Home minister Amit Shah chuan, Mizorama raltlan­te chhawmdawlna atan Mizoram sorkar hnenah cheng vbc 10 hu buhfai pek a nih tur thu a lo hrilh a ni.

Chief Minister chuan, Security Related Expen­diture (SRE) scheme hnuaia hmarchhak bialte'n ṭanpuina an dawn ṭhin chungchangah, Mizo­ram chu hel awm lohna state ralmuang a nih avangin pek a ni ve lo tih a sawi a; ruihhlo tawlh rûkna leh cyber crime donaah sorkar thâ tihchak nan SRE hnuaiah sum (funding) pe ve turin a ngen.

Amit Shah chuan, hmarchhak bial hma­sawnna tura ruahman bik Prime Minister’s Deve­lopment Initiative for North Eastern Region (PM-DeVINE) scheme-ah ruihhlo dona tur project thehlut zawk turin a lo ràwn a; project an theh luh hun­ah a lo bawhzui tur thu a hrilh nghal tih sorkar thuchhuahin a tarlang.