Vawiinah YMA Day lawm a ni dawn; 'Ruihhlo zuartute hi kan hmelma an ni' - Central YMA President

Vawiin June 15 hi YMA Day a ni a, Mizoram chhung leh páwn hmun hrang hrangah lawm a ni dawn. Central YMA president R Lalngheta chuan YMA Day thuchah a tichhuak a, ruihhlo zuartute chu Mizoram hmelma an nih thu a sawi.

Vawiin hian zing kar aṭanga zan lam thlengin YMA Day lawm a ni dawn a, Central YMA hruaitute'n branch hrang hrangah an hmanpui ang. YMA branch zingah hnatlanna atana hmang tur te, intihhlimna leh intihsiaknaa hmang tur te, ṭanpui ngaite puihna atana hmang turte an awm a ni.

CYMA President chuan, hlim taka YMA Day hmang turin YMA branch leh member-te duhsakna a hlan a, "YMA Day hian YMA-in kan ram leh khawtlang tana rawng kan bâwlnaah inpekna thûk zawk min neihtir se. Pu V Thangzama'n, 'Chanhai riangvaite puitu, thlafam lusûnte hnêmtu, Kristian êng chu an lo chhi, duhaisam chu hei ngei hi,' tia a lo sawi hi vawng nung zel ila. Chanhai riangvaite puitu, lusûnte hnêmtu kan nihna hi kalsan lo ila, Kristian kan nih anga Pathian rawng kan bàwlna a ni," a ti.

YMA kumpuan atan 'Ruihhlo do' hman mek a nih thu sawiin R Lalngheta chuan, "Hma nasa takin kan la a, kan la zel ang. Ruihhlo do turin CYMA level-ah Central Anti Drugs Squad (CADS) din a ni a, anni hian mutmu tuah mumal hman lo leh chaw a hun taka ei thei loin theihtawp chhuahin ruihhlo an do mek," a ti a; Aizawl bik chu hmun 10 (zone 10)-ah ṭhenin, Zone Anti Drugs Squad (ZADS)-te'n tlaivarin ruihhlo do hna an thawh thu a sawi.

R Lalngheta chuan, ruihhlo an man tam a, ruihhlo zuartute an ûm chêp hle tawh tih sawiin, "Kan ṭhalaite tibuaitu ruihhlo leh a zuartute do kawnga hma kan lakna a lawmawm tak zet a, mahse, inthlahdah thei kan ni lo. Ruihhlo zuartute hi kan chhungkua, khawtlang leh ram hmelma an ni a, a tàwp rât thlengin kan ûm tur a ni a, an lakah tlâwm thei kan ni lo," a ti.

CYMA President chuan, YMA-in Pathian malsawmna an dawng nasa tih sawiin, "Kan neih theih loh tur lirthei tam tak kan YMA sub-headuarters leh group ten kan dawng. Malsawmna kan dawnte hi CYMA hruaitute fel leh tlin vang ni loin, YMA kaltlanga ram rawng kan bâwlnaah theihtawp kan chhuahzia hretute kaltlanga Pathian malsawmna kan dawn a ni," a ti a; malsawmna an dawnte chu mipui rawngbawl nan hman tur a nih thu a sawi.

Kum 1935-a Young Lushai Association (YLA) tih hming púa din YMA-ah hian member 5,07,412 awm mekin, mipa 2,96,005 leh hmeichhia 2,11,407 an ni a; sub-headquarters pakua, group 49 leh branch 831 a awm mek. YMA branch 831-te chu Mizoram chhunga mi 774 leh state páwna mi 57 an ni a; India ram páwn Bangladesh-ah branch pakhat - Sajek Branch a awm bawk.