YMA Day 2026 hlim taka lawm a ni; Larsapin tlawmngaihna lantir zel turin chah

Nimin kha YMA din champha a ni a, Mizoram chhung leh pawn hmun hrang hrangah hlim takin YMA Day lawm a ni. Larsap Gen. Vijay Kumar Singh chuan YMA Day thuchah a tichhuak a, Mizo mipuite chu an thil tihna apiangah tlawmngaihna lantir zel tur leh, mahni inphat a, lainatna leh mi dang tana inpekna nunpui zel turin a sáwm.

YMA Day hi branch hrang hrangin an lawm dan a inang lo a, an remchan angin hun an hmang. Central YMA hruaitute'n branch eng emaw zatah an hmanpui a, ram hruaitute'n an hmanpui bawk.

Branch eng emaw zat chuan YMA Day pualin veng chhung leh thlânmual tihfai hnatlang an nei a, faina lama inelna atana hmangte pawh an awm. Branch tam takah hnam làm leh zai entir a nih bakah, intihsiaka hun hmang an awm nual a; infiamna hmanga intihhlimna leh intihsiakna hun hmang branch ṭhahnem tak an awm bawk.

YMA branch tam takin chhun lama hun an hman bakah, zan lamah vantlang inkhawm an buatsaih a, branch eng emaw zat chuan infuih tharna hun atan an hmang. Branch ṭhenkhat chuan an huam chhunga mi chhuanawm leh hlawhtling te, hruaitu hlunte hnenah chawimawina an hlan bawk a ni.

Governor Gen. VK Singh chuan YMA Day thuchah tichhuakin, Mizoram mipuite duhsakna chibai a bûk a; Mizo mipuite chu an thil tihna apiangah tlawmngaihna lantir zel ṭhin tur leh, mahni inphat a, lainat­na leh mi dangte tana inpek­na nunpui tlat turin a sáwm.

YMA chu khawtlang, hnam ziarâng leh nunphung chawi lâr leh tihhmasawnna tura pawl pawimawh a nih thu sawiin Larsap chuan, "YMA hi din a nih aṭanga vawiin ni thlengin mi dangte rawngbawlsak kawngah a khaipa ber a ni. Ṭanpui ngaite ṭanpui, Mizo hnam ziarâng, nunphung leh ro hlu chhawm nun kawngah YMA-in theihtawp a chhuah a, sorkar hmalaknate a hlawhtlin theih nan leh zau zawk a thlen theih nana ṭha taka a ṭawiawm ṭhin hi a lawmawm hle a ni," a ti.

Gen. VK Singh chuan, hnam bil hrang hrang inkara inunauna tihmasawn zel tur te, aia upa zah tur leh Mizo hnam ṭobul nghet taka vuan tur te, ruihhlo leh a kaihhnawih laka inthiar fihlim tur leh, ṭhalaite hmakhua ngaia theihtawp chhuaha zel turin YMA member-te a chah a; Mizoram mipui leh ram pum hamṭhat nan YMA chuan sorkar leh khawtlang huap pawl dangte nen ṭha taka hma an lak zel a beisei thu a sawi bawk.

YMA-ah hian member 5,07,412 awm mekin, mipa 2,96,005 leh hmeichhia 2,11,407 an ni a; sub-headquarters pakua, group 49 leh branch 831 a awm mek. YMA branch 831-te chu Mizoram chhunga mi 774 leh state páwna mi 57 an ni a; India ram páwn Bangladesh-ah branch pakhat - Sajek Branch a awm.

June 15, 1935 zan khan Sikul-puikawn bula Nepali School-ah vantlang inkhawm neih niin, Zosap missionary Pu Niara (Rev. Lewis Evans) hoin Young Lushai Association (YLA) din a ni a; YLA tih chu October 7, 1947 khan Young Mizo Association (YMA) tia thlâk a ni.