Hmasawnna tehfung langsar ber faina - UDPA Minister

Chawnpui Branch YMA chuan nimin khan an veng hall-ah YMA Day leh Aizawla YMA branch fai inelnaa pakhatna an nih an lawm a; an hun hmanpuitu Urban Development & Poverty Alleviation (UDPA) minister K Sapdanga chuan, hmasawnna tehfung langsar ber chu faina a nih thu a sawi.

UDPA Minister chuan, kawngpui ṭha, hmasawnna ruhrel man to pui pui engzat pawh awm mah se, fai taka enkawl an nih loh chuan hmasawnna tehfung an tlin loh thu a sawi a, "Hmasawnna tehfung langsar ber chu faina hi a ni a, zahawmna tehfung pawh faina tho a ni. Chawnpui vengin kum 2025 chhunga veng fai ber lawmman in dawng hi ka lawmpui tak zet che u a ni," a ti.

India ram puma faina beihpui thlakna Swachh Bharat Mission chungchang sawiin K Sapdanga chuan, "Kum 2047-ah India chu ram changkang (developed country)-a puan tlaka faitir turin sorkar laipuiin hma a la a ni," a ti a; Mizoramah pawh khaw tinah Swachh Bharat Mission beihpui thlak ve a ngaih thu a sawi.

Bialtu MLA TBC Lalvenchhunga pawhin thu sawiin, Chawnpui vengin sorkar aṭanga duhsakna an dawnte chu a lawmpui thu a sawi a, "Sorkar hmalakna hrang hrangah veng mipuite in lawm thiam ṭhin a, a phù pawh in phú a ni," a ti a; sorkar hmalakna tihhlawhtlin kawngah hma hruaitu veng ni turin a ngen.

Inkhawmah hian khuallian leh khualzahawmte hian YMA Day puala inelna hrang hrang buatsaiha lawm-mante an sem a ni.