Serchhip damdawi-ina Makeshift hawng

Serchhip District Hospital-a khum 15 awm theihna tura duan Makeshift building chu nimin khan Lok Sabha MP Richard Vanlalhmangaiha'n Serchhip Chief Medical Officer conference hall-ah a hawng.

Makeshift building sakna atan hian NEDFi aṭangin corporate social responsibility sum nuai 17.3 leh Lok Sabha MP fund nuai 20 hmuh a ni a; in sak hna thawktu Serchhip Joint VC chuan sum an hman bânte chu Chief Minister's Relief Fund-ah an chhûng lut vek a ni.

Richard Vanlalhmangaiha chuan, MP fund hmannaah ram tana ro tling tur a ngaih pawimawh thu a sawi a; Serchhip damdawi-ina Makeshift sakna atana hmalakna chu ngaihhlutawm a tih thu sawiin, "Kalphung thar sorkarin department hrang hrangah theihtawp chhuahin ṭan a la a, Health deparment hi deparment ṭhang nasa pawl a ni. Mizoramin Health Minister ṭha tak kan nei hi a lawmawm a, MUHCS pawhin ram pawn thlenga ngaihhlut a hlawh a ni," a ti.

Serchhip district chu district hmasawn tak nia a hriat thu sawiin Lok Sabha MP chuan, "DISHA meeting-a district hrang hrang ka tlawh kualnaah Serchhip district hi district tam takin central scheme kalpui danah an pha lo," a ti a, hmasawn zel turin duhsakna a hlan.

Serchhip district bawrhsap Paul L Khuma pawhin thu sawiin, damdawi-ina khum indaih lohnain mipui nunah leh ni tin khawsaknaah nasa takin nghawng a neih thu a sawi a; Makeshift chu mipuiin an chhawr nghal theih tura hman nghal a nih theih nan hma la turin Health department-a thawkte a ngen.

Inkhawmah hian medical superintendent Dr ZD Lalmuan-awma leh Serchhip Joint VC secretary Lalrinmawia Khiangte ten Makeshift building sak dan an sawifiah bawk.