Minister-in cocoa ṭiak a sem

Rural Development & Administration minister Prof. Lalnilawma chuan nimin khan a bial chhunga Keifang VC Hall-ah cocoa ṭiak a sem a; mi tin fairêl bél thleng phâk nih tumin sorkarin theihtawp a chhuah thu a sawi.

Cocoa ṭiak semna inkhawm hi Zo-Troy Agri-Horti Farmer Producer Company Limited leh Kangmual Farmers Association ṭang dun buatsaih a ni. Keifangah hian pilot project-in cocoa chìn kalpui niin, chhungkaw 16-in an chíng dawn a; cocoa ṭiak hi bialtu MLA-in MLA fund hmangin a leisak a ni.

Prof. Lalnilawma chuan, kut hnathawktute dinhmun ṭha zawka an din theih nan sorkarin theihtawp a chhuah thu a sawi a, "Sorkar chuan mi tin fâirel bél thleng phâk nih tumin sorkar chuan theihtawp a chhuah a, a sawi chauh ni lo, a tiha tih kan tum zel avangin kan sawi tawh chu bawhzui zel kan tum," a ti.

Hmasawnna tura hmalakna hrang hrangte a hlawhtlin theih nan beneficiary/partner-te an pawimawh thu sawiin Lalnilawma chuan, "Hmalaknate hi a hlawhtlinna kan hmuh ngei theih nan kan zavaiin thawhhona ṭha tak hnuaiah, taima leh rinawm taka kan thawhho zel a pawimawh," a ti a; cocoa ṭiak an phunte chu a lo puitlin hunah mi tinte'n mahni in chhungkhur aṭangin eizawnna ṭha tak an neih phah ngei a beisei thu a sawi bawk.