Minister-in YMA Rûn a hawng

Minister of state Prof. Lalnilawma chuan nimin khan a bial chhung khaw pahnihah YMA Day a hmanpui a; a MLA fund nuai 14 hmanga sak Mualpheng Branch YMA Rûn leh Lenchim Branch YMA golden jubillee lung a hawng.

Prof. Lalnilawma chuan, YMA chu Mizoram leh khawtlang tan a hlut thu sawiin, "Ruihhlo do kawnga YMA hmalakna a fakawm hle. Kan ram leh hnam boral loh nan ruihhlo leh a kaihhnawih lakah YMA member-te kan fihlim mai ni loin, a ṭhat lohzia mi dang zirtirtu kan ni tur a ni," a ti a; zirnaah hmasawn zel a ngaih thu sawiin, "Taimak, huaisen leh rinawm hi hlawhtlinna bul a ni," a ti.

YMA-in huang lo a neih loh thu sawiin Lalnilawma chuan, "Ruihhlo donaah a ni emaw, ram hmasawnna hnathawhnaah a ni emaw, mi dang ṭanpuina kawngah a ni emaw, kawng engkimah YMA hian huang lo a neih lo," a ti a; ram leh hnam humhalh leh siamṭhatnaah YMA-in theihtawp a chhuah ṭhin thu a sawi.