Zirnaah nasa zawka kan ṭan a ngai - Minister Lalthansanga

Minister Lalthansanga chuan nimin khan Khawhai Branch YMA-in YMA Day an lawmna a hmanpuinaah thu sawiin, Mizote zirnaah tun aia nasa zawka an ṭan zual a ngaih thu leh, sapṭawng bakah Hindi thiam a pawimawh thu a sawi.

Lalthansanga chuan, Hindi thiam a pawimawh thu sawiin, "Zirnaah hma kan sawn rualin, tun aia nasa zawka kan ṭan zual a ngai. Sapṭawng mai bakah, Hindi kan zir thiam a pawimawh em em a, Hindi kan thiam loh chuan kan hun kal zel turah harsatna kan tâwk thei a ni," a ti.

Mizo ṭhalaite nun ven uluk a ngaih thu sawiin Minister chuan, "Ruihhloin nasa takin kan ṭhalaite a rûn mek a, chhungkua, khawtlang leh ram nasa taka a nghawng avangin ruihhlo hi theihtawpa kan do a ngai a ni," a ti a; YMA kumpuan 'Ruihhlo do' chungchangah na taka hmalak a ngaih thu a sawi.

Lalthansanga chuan, tlawmngaihna chhawm nung zel turin Mizo mipui a chah a, "Zinmite'n kan ram an rawn hre zel a, kan ram sik leh sa leh thing leh mau ringawtte hi hmuhnawm an ti a ni. Kan pipute sûlhnu tun thlenga kan la hmuh theihte hi humhalh kawngah ṭan kan lak a ngai a, ṭhangtharte tana a pawimawhna kan inzirtir uar zel ka duh a ni," a ti.

YMA chu mi zawng zawng ta nih thu sawiin Lalthansanga chuan, "Sorkar pawhin ram tana hmasawnna hna a thawhnaah YMA leh pawl hrang hrangte nen inlungrual takin hna a thawk ṭhin," a ti a; Mizorama pawl, kohhran leh political party hrang hrangte phuar khawmtu chu YMA a nih thu a sawi.