Mahni nihna zahpui loh ngam a ṭul - B Lalchhanzova

Minister of state B Lalchhanzova chuan, mahni nihna zahpui loa lan chhuahpui ngam a ṭul thu sawiin, mahni theihna zâwn ṭheuha mi dang tan malsawmna nih a pawimawh thu a sawi.

B Lalchhanzova hian nimin khan Sialhawk North Branch YMA-in YMA Day an lawmna a hmanpuinaah thu sawiin, "Mahni nihna zahpui loa lan chhuahpui ngam a ṭul. Tu pawh, kut hnathawka eizawng emaw, zirlai emaw, eng mi pawh ni ila, khawvelah eng hna mah hi sang bik leh hniam bik a awm lo. Kan hma ṭheuha tih tur awm hi ṭha takin ti ila, dikna leh rinawmnain kan nun kaihruai se, mahni theihna zâwn ṭheuhah mi dang tana malsawmna nih a pawimawh," a ti.

Zirlaite chu ram leh hnam tan theihtawp chhuah tura chahin Minister chuan, "Mizote hi kan thluak a ṭha a, kan ram leh kan khuate hmasawnna kawnga thui tak kan thlen theih nan zirna lamah ṭan kan lak a ngai," a ti a; Sialhawk khawtlang hruaitute chu an khaw chhunga zirlaite hma lam pan tura fuih zel turin a chah.

Sialhawk North Branch YMA-ah hian member 570 vel an awm a, nikum leh kumin YMA Day inkarah YMA member thi an awm lo a, an huam chhungah ruihhlo zuar an awm lo bawk. B Lalchhanzova hian YMA Day lawmpui nan Sialhawk North YMA hnenah Rs 10,000 a hlan a ni.