KHAWTHLIR

Thisen pe

YMA Sub-Headquarters, Siaha leh Assam Rifles te chuan nimin khan YMA Day pualin Siahaah thisen pek an huaihawt a, Siaha District Hospital tan thisen unit 32 an pe a, petute mipa 23 leh hmeichhia pakua an ni. Donation camp-ah hian voluntary blood donation awareness campaign hun an hmang nghal. KṬP, Lawngtlai Bial pawhin World Blood Donors Day pualin nimin khan Lawngtlai District Hospital tan thisen unit 31 an pe a, petute mipa 22 leh hmeichhia pakua an ni.

Pangang khawi

Sericulture department chuan tun hnai khan Sialhawkah pangang khawitu chhungkaw 30 tan pangang khawi dan inzirtirna leh infuihtharna an buatsaih. Inkhawm hi Khawzawl district sericulture officer Melody C Vanlalruati’n a kaihruai a, Central Silk Board scientist-ten thil pawimawhte an zirtir a ni.

KMMTP enfiah

GAD secretary Sudir Kumar chuan tun hnai khan Lawngtlai leh Zorinpui inkar National Highway 502A, Kaladan Multi Modal Transi Transport Project kawngpui a enfiah. Sudir Kumar hian KMMTTP enkawltute leh Myanmar ram chhunga kawng siam hna thawktu Yourcon Infrastructure hotute a kâwm a, a chak thei ang bera thawk tura beisei an nih thu a hrilh.

Chetsualnaah thi

Lalrinpuia Punte (30) s/o Vanlalauva Punte (L) chu nimin chawhnu dar 1:40 vel khan lirtheia chetsualna vangin a thi. Bethel Ministry-in BCM, Tlabunga rawngbawlna an neiha BCM Immanuel ṭhutthleng an hawhte chu pick-up hmanga phurin, pe turin nimin khan an kal a; pick-up chu kawng chhoah a hnung zawngin a lìr a, Lalrinpuia Punte hi electric banah a nawr chilh a ni.

Minister-in hmanpui

Minister K Sapdanga chuan nimin khan Khatla South Branch YMA-in YMA Day an lawmna a hmanpui. Minister chuan, khawvel ram dangah leh hnam dang zingah YMA ang tlawmngai pawl lian, YMA thawh ang thawk an awm loh thu sawiin, "Hetiang pawl Mizoten kan nei hi ngaihhlut nachang kan hre tur a ni," a ti.