City bus pick & drop system zâwm ṭha lote thuneitute hnenah report turin ngen

State Transport Authority (STA) chuan thuchhuah siamin, Aizawl city bus hmang ṭhinte awlsam zawkna tura pick & drop system kalpui mek chu zâwm ṭha lo an awm tih an tarlang a; pick & drop system zâwm ṭha lote chu thuneitute hnenah hriattir turin mipui an ngen.

STA chuan, Aizawl city bus pick & drop system chu June 1, 2026 aṭangin kalpui a nih thu a tarlang a, "City bus service-te chu an stand-ah rei tak ding tawh lo a, passenger luh leh chhuah hun chhung chiah ding tawh tura hriattir an ni. Thupek kengkawh tur hian ACBOA, Traffic Police leh Transport department enforcement staff ten hma an la mek a, duty-te hian city bus stand tinah an vil reng thei lo. Hei hi remchangah lain city bus ṭhenkhatte'n pick & drop system hi an zâwm ṭha tâwk loa hriat a ni," an ti.

Pick & drop system chu mipui hmakhua ngaia ruahman a nih thu sawiin STA chuan, city bus-a chuang ṭhinte chu a ṭul anga lo vil ve turin an chah a; pick & drop system zâwm ṭha duh lote chu thuneitute hnena hriattir turin an ngen.

Pick & drop system zâwm lote city bus-te chu Directorate of Transport phone number 0389-2316080, Traffic Control Room phone number 0389-2322307/9366553559 leh ACBOA office phone number 9436199682-ah te hriattir theih a ni.