Mi pawngsualtu leh acid thehtu BSF mi 2 thiam loh chantir an ni

Border Security Force (BSF) mi leh sa pahnih, July 16, 2017-a Chakma hmeichhe pakhat pawngsuala thattute leh hmeichhe pakhat hmaia acid thehtute - Nilanjan Das s/o Sushil Kumar, Amra Barie, West Bengal leh Dinesh Kumar s/o Raghunath Singh, Chhajupura, Uttar Pradesh te chu Court-in thiam loh chantirin, kum 42 chhung táng turin a hrem.

Aizawl Additional District & Sessions judge Sylvie Z Ralte judgement order-a tarlan danin, pawikhawih hun hi July 16, 2017 a ni a, July 18, 2017-ah FIR thehluh niin, July 17, 2018-ah police-te'n court-ah chargesheet an thehlut. Court chuan June 12, 2026 khan thutlukna siamin, mi pahnihte chu thubuai pathumah thiam loh a chantir a, nimin khan anmahni hremna tur a tichhuak leh a ni.

Nilanjan Das leh Dinesh Kumar te hi IPC Section 376D (pawngsual rawn) thubuaiah thiam loh chantir niin, kum 20 chhung hrehawm taka táng tur leh, Rs 20,000 ve ve chawi tura hrem an ni a; pawisa an chawi loh chuan thla hnih dang an tàn belh ang.

IPC Section 376(2)(m) hnuaiah hrehawm taka kum 10 chhung táng tur leh, Rs 20,000 chawi tura hrem an ni bawk a; pawisa an chawi loh chuan thla hnih dang an tàn belh ang. IPC Section 326A (acid hmanga mi beih) hnuaiah hrehawm taka kum 12 táng tur leh, Rs 20,000 chawi tura tih an ni a, pawisa an chawi loh chuan thla hnih dang tàn belh tura tih an ni bawk.

Thubuai pathuma an tàn hun chhung tur belh khawm chu kum 42 a ni a, pawisa an chawi tur zat belh khawm chu Rs 60,000 a ni.

Court chuan pawikhawihna tuartu chu CrPC Section 357A tlawhchhanin, Victim Compen-sation Scheme hnuaiah zangna-dawmna pe turin sorkar a hriattir a; a ṭul anga hma la turin Mamit District Legal Services Authority a hriattir bawk.