Stop Diarrhoea Campaign ṭan

Kawṭhalo tibo tura beihpui thlakna, ‘Stop Diarrhoea Campaign’ chu nimin khan India ram pumah hawn a ni a, Mizoramah pawh hmun hrang hrangah hawn a ni. Kumina Campaign thupui chu 'Kawṭhalo ven nan faina leh ORS a pawimawh’ tih a ni.

Stop Diarrhoea Campaign hawnna hi Aizawlah chuan Edenthar Venga BSUP complex-ah hman niin, Aizawl mayor H Lalremtluanga'n a hawng. Mayor chuan, kawṭhalo vanga thihna thleng ṭhin chu ûm bo theih a nih thu sawiin, "Inzirtirna kalpui zel a pawimawh. PHE department, Health department leh AMC te chuan mipui hriselna leh faina turin ke kan pen zel dawn. Kawṭhalo hi natna tlanglawn tak ni mah se, kum 2025 chhungin India ram pumah naupang nuai 1.2 laiin an thihpui a ni," a ti.

H Lalremtluanga chuan, ORS leh Zinc damdawi hmanga inenkawl a pawimawh thu sawiin, "National Health Mission hnuaia sorkar sub-centre leh ASHA thawktute aṭangin Zinc leh ORS a thlawnin lak theih reng a ni," a ti a; AMC-in BSUP-a chengte a ngai pawimawh a, hma an sawn zel nan hmalak a inhuam thu leh thawhhona ṭha tak an neih theih a beisei thu a sawi.

STOP Diarrhoea Campaign hi June 16 - July 31, 2026 chhung kalpui tur a ni a, Mizorama naupang kum 5 hnuai lamte hnenah anganwadi centre, sikul leh damdawi-in hrang hrangah ORS & Zinc corner siam a ni ang. Corner-ahte hian damdawi (ORS & Zinc) a thlawnin sem a ni dawn a, naupang kum 5 hnuai lam 1,02,717 hnenah pek tum a ni.

Campaign chhung hian kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil dan dik te, faina leh thianghlimna chungchanga naupang leh anmahni enkawltute tana hriat tur pawimawh hrang hrang inzirtirnate buatsaih a ni ang.