KHAWTHLIR

Blood Donor Day

Nimin khan Champhai District Hospital OPD Complex-ah World Blood Donor Day hman a ni a, blood bank officer Dr Krossnunpuii'n kaihruaiin, YMA Sub-Hqrs president PC Lalrawnliana'n a hmanpui. Champhai district-a pawl hminga thisen pete hnenah chawimawina thuchei hlan a ni a, thisen pek chungchanga thutiam sawi rual a ni. WBDD hi June 14 a ni a, kuminah Pathianni a nih avangin hun remchang dangah hman niin, Aizawlah chuan vawiinah hman a ni dawn a, kum 2025-26 chhunga pawl hminga thisen pe ṭhate hnenah chawimawina hlan a ni ang.

Lungphun hawng

Minister of state B Lalchhanzova chuan nimin khan Zuchhip Hmun Hlui Humhalhtu Pawl buatsaih Zuchhip khaw hmun hlui lung-phun a hawng a, AMC executive corporator Christina Roluahpuii Sailo-in a ṭawiawm. Khaw-zawl Zuchhip hmun hlui huam chhunga lungdawh leh thlan awmte humhalh a ni a, kum 2020 khan ruihhlo ngaite enkawlna tur Chhanchhuahna Home din niin, home-ah hian mi 32 enkawl mek niin, enkawltu mi 10 an awm a ni.

MLA-in hmanpui

Lunglei West bialtu MLA T Lalhlimpuia chuan nimin khan MUP, Lunglei Venghlun Unit golden jubilee lawmna Venghlun Indoor Stadium-ah a hmanpui. T Lalhlimpuia chuan, khawtlanga mi hlawhtling tak tak chher chhuaktu chu upate an nih thu leh, khawtlang leh hnam nuna upate thurawn leh an hlutna ngaihnêp theih a nih loh thu a sawi. Lunglei Venghlun MUP hi June 16, 1976-ah din a ni a, member 187 an awm.

Kawng thawm ṭha

Thingthelh Branch YMA chuan nimin zing khan YMA Day pualin an khaw bul hnaih kawng chhia siam hnatlang an ko a, mi eng emaw zat an thawk chhuak. Nikum lama PWD-in kawng sira lung (boulder) an dah, hman zui lohte hmangin kawng khuar zual lai an hnawh mâm a ni.

Graduation Dinner

Zirtiri Residential Science College chuan nimin khan Dawrpui Multipurpose Hall-ah Graduation Dinner leh Personality Development Programme 2026 kharna hun an hmang a, Higher & Technical Education director Lalṭanpuia'n a hmanpui. Personality Development Programme hi Zirtiri College hian final zirlaite tan eng kawngah pawh mahni inringtawk taka an awm a, an hlawhtlin zel theih nana infuih thar nan kum 14 chhung a kalpui tawh a ni.

VB-G RAM G zirho

Serchhip DRDO chuan nimin khan Serchhip BDO conference hall-ah ni 125 inhlawhna (VB-G RAM G) zirhona an buatsaih a, district bawrhsap Paul L Khuma'n a hmanpui. Zirhonaah hian thupui hrang hrang - VB G RAM G kalphung te, Solid Waste Management Act 2026 leh scheme hnuaia hnathawh phal chin chungchangte zirho a ni.