Hmeichhe naupangte hamṭhatna tur 'Project Thaichhawninu' tlangzarh a ni
Beti Bachao Beti Padhao (BBBP) hnuaia Women & Child Development leh Postal department hmalaknaa naupang hmakhua ngaihtuahna tura duan 'Project Thaichhawninu' chu nimin khan Social Welfare, Women & Child Development minister Lalrinpuii'n Booth Mansion Conference Hall, Aizawlah a tlangzarh.
Project hming ‘Thaichhawninu’ hi Mizo thawnthu 'Mauruangi leh Bingtaituki' aṭanga lak a ni a; Mauruangi nu-in rethei tak chung pawha a fanu tan thaichhâwni nu anga a inpe angin, tunlaia nu leh pate'n Sukanya Samriddhi account hmanga an fanute hmakhua atan an inpek ve theihna tura duan a ni. Mizorama district 11-a RD block 27, ICDS huam chhung khaw hrang hrangah kalpui tur a ni ang.
Project Thaichhawn-inu-ah hian hmeichhe naupangte chu Post Office leh State Bank of India kaltlangin account hawnsak theih a ni dawn a, anganwadi worker leh Postal department-a thawktute'n khaw tinah awareness campaign leh account hawn rûnpui an nei buatsaih dawn. Thla 10 chhungin kum 10 hnuai lam hmeichhe naupang 4,050 ziah luh hman tum a ni. Mizoramah kum 10 hnuai lam 1,50,000 chuang awm anga ngaiha ni a, hmeichhe naupang 18,560-in SSY account an nei tawh.
Minister Lalrinpuii chuan, Project Thai-chhawninu chu hmeichhe naupangte hamṭhatna leh nu leh pate mawhphurhna pawimawh tak tilang thei a nih thu a sawi a; hmeichhe naupangte chu ram leh hnam innghahna an nih thu sawiin, "An hmakhua hi Mizoram hmakhua a nih avangin an hamṭhatna ngaihtuah hi nu leh pate mawhphurhna pawimawh ber pakhat a ni," a ti.
Lalrinpuii chuan, Mau-ruangi dam khawchhuahna turin a nuin theitawp a chhuah angin, hmeichhe naupangte'n hmakhaw êng tak an neih theihna tura kaihhruai leh ven him chu nu leh pa koa tla a nih thu a sawi a; kum 10 la tling lo hmeichhe naupangte tan SSY account hawnsak ṭheuh turin nu leh pate leh pi leh pute a chah.
Project Thaichhawninu tlangzarhna inkhawm hi SWWCD secretary Lalzarmawi-i'n a kaihruai a; India Post superintendent (Mizoram Division) KI Singh-a'n Project chungchang a sawifiah a ni.