SIR 2026 hun ruat tihdanglam a ni; Voter 7,61,709-te digitisation ti tawh

Election Commission of India (ECI)-in Electoral Roll Special Intensive Revision (SIR) thawh thumna neih meka Mizoram tana draft electoral roll tihchhuah hun tura tih, July 5, 2026 chu Pathianni a nih avangin July 4, 2026-a tihchhuah turin a sawn. Mizoramah voter 8,76,068 zinga mi 7,61,709-te digitisation tih a ni tawh.

Sorkar thuchhuah tarlan danin, Mizorama SIR 2026 electoral roll tihchhuah hun tura ruat, July 5 chu Pathianni a nih avangin, Mizoram Chief Electoral Officer (CEO) chuan sawn turin a ngen a; ECI chuan draft July 4, 2026 Inrinni a ruat ta a ni.

Hemi rual hian sawisel leh siamṭhat hun tur atan ruat, July 5 - August 4, 2026 pawh July 4 - August 4, 2026 ni turin ECI chuan a siamrem a; notice phase/disposal of claims & objections pawh July 5 - September 2, 2026 tura ruat ni tawh mah se, July 4 - September 2, 2026-ah thlak a ni bawk.

Mizorama SIR, 2026 kalpui mekah tun dinhmunah enumeration form sem zawh thawkhat tawh a ni. Form digitization-ah Mizoram chu SIR kalpui mekna state dangte aiin a sang fâl hle niin sorkar thuchhuah chuan a tarlang.

Tarlan danin, Mizoramah voter 8,76,068 an awm a, chung zinga mi 7,61,709 chu digitisation tih zawh tawh niin, voter awm zat aṭangin 87.05% a ni.