MES tharte Minister-in lawmpuina hlan

PHE minister Prof. Lalnilawma chuan nimin khan Mizoram Engineer Service (MES) exam-a tling thar mi pasarih, PHE department-a thawk turte a pisaah lawmpuina a hlan a; hna an thawhna leh hmalakna apiang chu mipui leh ram tan ti zel turin a fuih.

Prof. Lalnilawma chuan, engineer-te chu department mai bakah, Mizoram hmasawnna lungphûm an nih thu a sawi a, "Mipui ta in ni a, in hnathawh leh hmalakna apiang chu mipui leh ram hmasawnna atan ni zel rawh se," a ti a; mi dangte ṭanpui duhna thinlung pu a, mipuiin an mamawhnaah theihtawp chhuah tur leh, a ṭul anga mipui ṭanpui theihna tur kawng zawng ṭhin turin a chah.

Engineer-te chu sorkar kutke an nih avangin rinawm leh taima takin an thawh a ṭul thu sawiin Lalnilawma chuan, "Khawi hmunah pawh awm u la, in awmna hmun apiangah theihtawp chhuah zel rawh u," a ti. Transfer & posting-ah buai lo tur te, sorkarin a dahna apiangah phûr taka kal zel tur te, hmun harsa leh kilkhawrah pawh awm se, hlawh-tlinna ṭha tak neih tum turin a fuih a ni.