Two wheeler khu chhuahna tichhia

Lunglei Traffic Police-te'n Lunglei khawpuia two wheeler khu chhuahna (silencer/exhaust) rin zawng decibel 80 pêl leh ri ring tura siam danglam an man khawm chu nimin khan Lunglei district Chief Judicial Magistrate hriatpuinain Lunglei Pukpui Ṭawngṭaina Hmunah tihchhiat a ni.

Two wheeler silencer/exhaust tihchhiat inkhawm hi SDPO Alex Hmingthanmawia'n a kaihruai. Two wheeler silencer/exhaust pipe an tihchhiatte chu a vaiin kg 45-a rit a ni a; tun hi Lunglei traffic police-te'n two wheeler silencer/exhaust ri bengchheng an man khawmte dan anga an tihchhiat ṭum lina a ni.

Nimina two wheeler silencer/exhaust pipe tihchhiate chu thirchhia anga hralh a ni a, hralhna aṭanga sum hmuh chu sorkar sum báwmah chhûn luh a ni ang.

Lunglei SP J Lalmuankima chuan, ṭhalai ṭhenkhatin an two wheeler-ah danin a phal baka silencer/exhaust ri bengchheng an hman ṭhin avangin zan reiah mipui an timuhil thei lo ṭhin tih a sawi a, "Mihring hriselna thlengin a nghawng thei a ni," tiin, nasa zawka hmalak chhunzawm zel an tum thu a sawi.