ZPM president Lalliansawta'n mawhphurhna a chelh zui dawn

ZPM president Lalliansawta chuan a hriselna dinhmun avanga hun eng emaw chen party president mawhphurhna a chelh loh hnuah vawiin aṭangin a chelh leh tawh dawn.

Lalliansawta hian nimin khan office order tichhuakin, Pathian khawngaihna zarah vawiin aṭangin president charge a lak leh theih tawh thu a tarlang a; meeting kaihhruai leh ṭul dangah a ṭul anga pui chhunzawm turin ZPM Legislature Party leader Lalduhoma chu ex-officio EOB a nih angin a ngen nghal.

Tarlan tawh angin, ZPM president Lalliansawta hian party president mawhphurhna a pek angin ZPM leader Lalduhoma, chief minister chuan April 22, 2026 aṭang khan ZPM president mawhphurhna a chelh lailâwk.

ZPM tarlan danin, ZPM president Lallian-sawta chu taksa lam harsatna avangin hun eng emaw chen a chawlh a ngai dawn a; a chawlh chhung atan ZPM Legislature Party leader Lalduhoma chu president mawh-phurhna a hlan a ni. Tuna ZPM office bearer ni mekte hun hi kum 2027-ah a tawp dawn.