Aizawlah Horticulture Fair ṭan a ni

Nimin khan Lammualah Horticulture Fair ṭan a ni a, Horticulture minister C Lalsawivunga'n a hawng. Minister chuan, kum 1972-a Mizoram union territory a nih aṭangin Mizoramin intodelhna mumal a la neih loh thu sawiin, ṭan lak thar a ṭul thu a sawi.

C Lalsawivunga chuan, Mizoram UT a nih ṭan aṭangin kum 50 chuang leh state a nih hnuah kum 40 dáwn a liam tawh thu sawiin, "Hetih chhung hian intodelhna mumal a la awm lo a, thlai leh thei thar chhuah leh thil siam chhuah lamah intodelhna sawi tur a la awm lo. Hmasawn zawnga ke kan pên a ṭul tawh hle a, theihtawp chhuaha kan ṭan tlan a ngai," a ti.

Fair hmangin hmasawnna kawng ngaihtuah a ṭul thu sawiin Lalsawivunga chuan, "Phai lama an hlâwkpui ang tho kan tih ve chuan kan phâk kher lo ang. Phai lama an thar ṭhat lutuk loh, Mizorama ṭha duh si ang hi kan ngaihtuah a ngai," a ti a; Mizoram sorkarin sapthei hmangin pilot project kalpui a tum mek thu a sawi.

Horticulture Minister chuan, thei, thlai leh pangpar thara zuartute'n hlâwkna an neih theih nan Horticulture department-in kum 2012 aṭangin Horticulture Fair an buatsaih ṭhin thu a sawi a, "Kut hnathawktute'n an hlawkpui ṭhin a, hmunhma zau ṭha a awm loh ṭhin avangin thil tih a harsa ṭhin. Kuminah chuan ruahmanna fel tak siama Lammualah Fair buatsaih a ni ta hi a lawmawm a, nakkum lamah pawh tun aia changtlung zawka buat-saih kan tum ang," a ti.

Fair-ah hian district tina kut hnathawktu thawk ṭha thlante hnenah Minister hian chawi-mawina, Best Horticulture Farmer Award a hlan a ni. Inkhawm hi Horti-culture director CH Lal-muanpuia'n a kaihruai a, minister of state Prof. Lalnilawma pawhin thu a sawi.

Horticulture Fair hi kum 2012 khan buatsaih ṭan niin, kumin hi vawi 13-na a ni a; kum 2012 - 2025 chhung khan Horticulture Fair-a stall siamte chuan an thil zawrhte Rs 3,76,90,607 man an hralh. Kumina Fair-ah hian stall 273 hawn a ni a, June 20, 2026 thleng a awh dawn a ni.