KHAWTHLIR

Sarâng hman khap

UDPA department-in Aizawl district-a tourist site atana hmun pasarih a thlanteah hman khat daih sarâng (single-use plastic) hman, hralh, sem leh kawl khap a ni a; environment tichhe thei lo leh hman nawn theihte chauh hman tur a ni. Sorkar thuchhuah tarlan danin, UDPA department-in Aizawl district-a tourist site a thlante chu - Lalsavunga Park, Falkawn Zokhua, Sakawrhmuituai tlang, Hmuifang tlang, Khawhpawp (Lawipu), Sairang rél chawlhhmun leh Sialsuk tlang te a ni.

Valedictory Day

J Buana College, Lunglei chuan nimin khan an college multipurpose hall-ah an zirlai chhuak turte thlahna, Valedictory Day an hmang a, zirlai 148 an thlah. Inkhawmah hian vice principal Lalrotluanga'n fuihna thu a sawi a, zirlai ṭhaa thlante hnenah chawimawina hlan a ni.

Inven dan tur sawiho

Lawngtlai District Disaster Management Authority chuan nimin khan an chairman Donny Lalruatsanga, bawrhsap hoin fûrpui thleng tura chhiatna thleng thei laka inven dan tur an sawiho. PWD, NHIDCL, ABCI, RDS leh PMPL te chu an enkawl kawngpui ṭheuh atan ruahmanna felfai tak siama inring renga awm turin an ti. Mipuiin awlsam zawka an biak theih nan an enkawl ṭheuh kawng sirah phone number târ turin an ti bawk.