Lungleiah 'Be DC for a Day' hun hmang

Lunglei Bawrhsap ruahmannain nimin khan Nasha Mukt Bharat Abhiyaan (NMBA) hnuaia ruihhlo do dona péng khat atan leh Special Intensive Revision (SIR) 2026 hnuaia electoral roll ennawn rûnpui kalpui mek hlawhtlinna atan 'Ni khat atan Bawrhsap' (Be Deputy Commissioner for a Day 2.0) buatsaih a ni.

Be Deputy Commis-sioner for a Day 2.0 hi sikul zirlaite'n hmathlir leh tum sang zawk an neih theihna tura buatsaih a ni a; bawrhsap hnathawh dan a taka an hriatna tur leh mawhphurhna pawimawh la ngam tura fuihna atan Lungleia zirlai 13 chu bawrhsap ṭhutthleng luahtir an ni.

Bawrhsap hna thawh dante hrilhfiah an nih bakah, bawrhsap pisaa péng hrang hrang – Planning, Establishment, Aadhaar Cell, Disaster Management leh Election Section te fanpui an ni a, thawktute nen an inkâwm a; thuthar thehdarhtute nen an inkâwm.

DC hmalaknaa Civil Hospital, Lungleia Health ATM leh Leitlangpui High School-a Cosmic Class tlawhpui an ni a; SIR kalpui meka electoral roll dik, felfai leh kimchang a awm theihna tura booth level officer-te hnathawh leh hmalakna a hmunah enpui niin, mipui rorelna (democracy) chungchanga thil pawimawhte zirtir an ni bawk.

Lunglei DC Navneet Mann chuan, Be Deputy Commissioner for a Day-ah zirlaite phûr taka an tel leh hlawhtling taka hun hman a ni chu a lawm thu a sawi a; sikul leh khawtlangah a ṭha zawnga danglamna thlentu ni tur te, an tawnhriatte ṭangkai taka hmang tur te, ruihhlo do leh democracy pawimawhna puang darhtu palai nih tum ṭheuh turin zirlaite a chah.