MLA-in school uniform pheikhawk a sem

Aizawl West-II bialtu MLA Lalnghing-lova Hmar, minister of state chuan nimin khan a bial chhung sikul pahnih - Dinthar Primary School leh Gairigaon Primary School zirlaite hnena sikul uniform pheikhawk a sem.

Pheikhawk semna inkhawm hi Dinthar YMA Hall-a buatsaih a ni a; Lalnghinglova Hmar chuan, a bial chhung veng hrang hranga sorkar primary school-ah uniform pheikhawk an sem dawn thu sawiin, "Kan bial chhunga sorkar PS zirlai zawng zawngte'n an dawng vek ang. Sorkar sikula lutte kan puihna tura sem kan ni. Kum tharah engtin nge kan inpuih leh theih ang tih kan ngaihtuah leh dawn," a ti.

West-II Bialtu MLA chuan, Mizorama zirtirtu ṭha berte awmna chu sorkar sikulte a nih thu sawiin, "Sorkar sikulah chuan trained teacher vek an awm. Nimahsela, a pawl hniam lamah sorkar sikula inkaltir hrehna a awm ṭhin a, Aizawlah sorkar sikulte hi luh nan a ṭha tawk a ni tih hi Aizawl West-II aṭang hian hriattir kan duh," a ti a; an bialah zirna tihhmasawna tihlen zel an tum thu a sawi.

LESDE minister Lalnghinglova chuan, zirlai nu leh pa, ni tina inhlawha eizawngte chu Mizoram Building & Other Construction Workers Welfare Board (MBOCWWB) a inziak lut tura sáwmin, "MBOCWWB member fate zirnaah hamṭhatna hrang hrang an ban phakah a awm. LESDE office-ah cheng 10 chawia inziah luh theih reng a ni. In fate'n zirna sang zawk an kai thleng pawha hamṭhatna dawn tur a awm a, dam lohna thilahte leh thil dangah pawh hamṭhatna dawn tur a awm," a ti.

Aizawl West-II MLA-in sikul uniform pheikhawk a semnaah hian a thawh khatnaah Dinthar venga sorkar PS pahnih aṭangin zirlai 214-in pheikhawk an dawng. Tun kar leh kar leh tìr lamah sem chhunzawm a ni dawn a, PS zirlai 673 hnenah pheikhawk pek tum a ni.