Thenzawlah bawlhhlawh paih lirthei hlân

Formosa Foundation chuan Thenzawl Joint YMA hnenah bawlhhlawh paihna lirthei (garbage tipper) an pe a, nimin khan bialtu MLA chief minister Lalduhoma'n a hlan.

Thenzawl Joint YMA Hall-ah bawlhhlawh paihna lirthei inhlanna inkhawmah Chief Minister chuan, "Mizorama khualzin lo kalte'n min fak ṭhinna langsar tak chu, khawi hmun pawh a lo thianghlim viau zel hi a ni a, faina leh thianghlimna hian kan ram leh hnam a chawimawi mek. Chuvang chuan, Mizoram mipuite'n faina kan uar deuh deuh a ngai," a ti.

Thenzawl khua chu India rama Mizoram khaw lâr ber zinga mi a nih thu sawiin Lalduhoma chuan, "A hmunhma a rem a, khualzin pawhin an hre tawh hle a, tlawhtu a ngah tial tial a, khaw dang zawng aia in fai bik pawh a tul. Chu mi hre chung chuan Formosa Foundation-in lirthei an rawn pe che u a ni," a ti a; faina leh thianghlimna uar deuh deuh turin Thenzawl mipui a chah.

Lirthei inhlanna inkhawm hi Thenzawl Joint YMA president Lalmuanpuia'n a kaihruai a; MLA Baryl Vanneihsangi leh Formosa Foundation chairman Jonathan Lalremruata te pawhin thu an sawi a ni.