Tuialhtheia cess lâk titawp turin Chief Minister-ah ngenna an thlen

Mizoram Pradesh Congress Committee (MPCC) chuan tuialhtheia chhiah (cess) lak titawp tura ngenna nimin khan chief minister Lalduhoma hnenah ziakin an thlen.

Khawvelah tuialhthei man a pun zel avangin India ram leh Mizoramah pawh namenloin petrol leh diesel man a pung tawh tih tarlangin MPCC chuan, "Kan hriat theih chinah Mizoramah bik petrol leh diesel man a san ber tum a ni hial awm e. Heti taka tuaialhthei man a lo pun tak avang hian mipuite leh lirtheia eizawng tam takin harsatna an tâwk mek a ni," an ti.

MPCC chuan, nasa taka tuialhthei man a pun avanga mipuiin harsatna lian zawk an tawh loh nan Mizoram sorkarin September 2024 aṭanga petrol leh diesel aṭanga cess chi hnih, a vaiin litre khata Rs 4 zel a lak mek hi mipui phurrit chhâwk zângkhai nana titawp rih turin Mizoram sorkar an ngen thu CM hnenahah ziakin an thlen a ni.

Mizoram sorkarin value added tax (VAT) aṭangin petrol leh diesel-ah chhiah a la sa reng tho tih tarlangin MPCC chuan, "Tuialhthei man tipung lehzual tura litre khat zela Mizoram sorkarin cess Rs 4 a lak belh mek hi mipuite zângkhai zawk nana sût turin sorkar kan ngen a ni," an ti a; June 2026 ral hma ngeia sût turin an ngen.

Congress party chuan, an hun tiam chhunga tuialhthei aṭanga cess lak tihtawp a nih loh chuan mipui thlavang hauh turin hma an lak chhunzawm dawn thu an tarlang bawk.