Dawrpui leh Chhinga Veng ramri chingfel turin committee din a ni

Dawrpui leh Chhinga Veng ramri buai chungchangah Aizawl Municipal Corporation (AMC) hotute chuan nimin khan AMC conference hall-ah veng pahnih khawtlang hruaitute an kâwm a; ramri chungchanga veng pahnihte inkara buaina chingfel turin committee an din.

Ṭhutkhawm hi Aizawl mayor H Lalrem-tluanga’n a kaihruai a; AMC executive corporator-te leh official-te bakah, veng pahnih aṭangin local council member-te leh pawl hruaitute an tel.

Mayor H Lalremtluanga chuan, veng ramria buaina awm chu pawi a tih thu sawiin, chinfel theih a nih a beisei thu a sawi a; buaina a fel thuai theih nan rilru zau tak pu tur leh, remna leh muanna a awm theih nan hma la turin LC leh khawtlang hruaitute a ngen.

Sawihonaah hian veng ramri chungchanga buaina leh a kaihhnawih thil thleng dangte pawh sawihoa chingfel turin Committee on Land Dispute between Chhinga Veng and Dawrpui Veng an din a ni.

Khawtlang hruaitute chuan, “Vawiina veng aiawh kalkhawmte hian Committee on the Land Dispute between Chhinga Veng and Dawrpui-in hma a lakna piah lamah hmalak rem kan ti lo a, hmalakna dang reng reng engmah a thlen loh nan hma kan la ang,” tiin resolution an siam.

Committee-ah hian chairman atan deputy mayor R Lalawmpuii leh vice chairman atan Ward-IX (Dawrpiu leh Chhinga Veng awmna) bialtu corporator B Lalawmpuii ruat an ni a, secretary atan AMC deputy commissioner K Vanlalruata ruat a ni. Member atan AMC executive corporator palite bakah, veng pahnih aṭangin LC chairman leh member pakhat ve ve, YMA, MUP leh MHIP aṭangin president leh secretary ve ve ṭheuh leh priminent citizen pakhat ve ve ruat an ni bawk.

Kumina YMA Day faina hnatlangah Chhinga Veng mite'n an veng chhunga an ngaihah Dawrpui veng mite an hnatlan avangin buaina a awm a; Chhinga Veng mi ṭhenkhatin Dawrpui Thlanmual signboard an lak thlâk bakah, Armed Veng lamin thil an tarte an la thla a ni.