CM-in Police lirthei thar 219 a vailiam; HM leh a thawhpuite chungah kan lawm - CM

Chief minister Lalduhoma chuan nimin khan Mizoram Police-in Assistance to State & UTs for Modernisation of Police Scheme aṭanga lirthei chi hrang hrang an lei thar 219 chu 3rd MAP Parade Ground aṭangin a vailiam a; Home Minister leh a thawhpuite chungah an lawm thu a sawi.

Police thuchhuah tarlan danin, Assistance to State & UTs for Modernisation of Police (ASUMP) aṭanga sum an hmuhte chu state share-te nen cheng vbc 43.87 a ni a, Central share vbc 39.37 leh state share vbc 4.50 a ni. Lirthei lei nan cheng vbc 30.45 hman a ni a, a dang chu police thuam chakna hmanraw thar chi hrang hrang lei nan hman a ni.

Chief Minister chuan, kum 2017 aṭangin ASUMP aṭanga lirthei lam chi lei sorkar laipuiin a khap thu sawiin, "Kan police-te'n lirthei lamah harsatna an tâwk chho a, Assembly House lamahte pawh sawi rik a ni ṭhin," a ti a; Mizoram Police-in an mamawh êm avangin nikum khan sorkar laipuiah action plan an theh luh thu a sawi.

Action plan chu DGP Sharad Agarwal-a'n theihtawp chhuaha a bawhzui thu sawiin Lalduhoma chuan, "Min rawn phalsak ta a ni. Technical thilah harsatna kan neih avangin Mizoram hian Police Modernisation Scheme hi kum 2021 aṭang khan kan dawng tawh lo. Kan sorkarah kan hmu thar leh ta hi a lawmawm a, a chhinchhiah tlak. Kan Home Minister leh a thawhpuite chungah kan lawm hle a ni," a ti.

Home minister K Sapdanga chuan, Mizoram Police thawhrimnaah an lawm thu sawiin, "Lirthei tharin an ni tin hnaah awlsamna tam tak a thlen kan beisei. Kan police-te thuam chak hi kan ram himna thuam chakna leh khawtlang nuam neihna a ni tih kan hria," a ti a, police-te thuam chak zel tum a nih thu a sawi.

Police lirthei lei tharte hi an la rawn thleng kim lo a, a thlen kim hunah chuan a vaiin 219 a ni ang. Mizorama police station zawng zawng (44)-in lirthei thar pakhat tal an dawng vek dawn a ni.

Mizoram Police chuan, "Lirthei tharte hian Mizoram Police hmasawnna leh changkanna kawngah nasa taka kawngro a su dawn a, dan leh hrai kengkawhna kawngah leh ram leh mipui rawng kan bâwlnaah nasa taka min puih ngei kan beisei," an ti.

MIZORAM POLICE LIRTHEI THARTE

✓ Boruak tichhe lo chi (eco-friendly) electric scooter 15 leh motorcycle (160cc) 21.

✓ LMV 96 - Scorpio N (4x4), Bolero Neo, Bolero B6 leh Bolero Camper.

✓ Heavy motor vehicle (HMV 18.

✓ Medium motor vehicle (MMV) 30.

✓ Medium motor vehicle (MMV) bus 24.

✓ Tui phurhna (water tanker) 5.

✓ Tâng phurhna lirthei (prison van) 3.

✓ Toyota Fortuner bullet-resistant 3 (Z+ category VVIP security duty atana hman tur).

✓ Lirthei hnuhna (towing truck) 4 (Traffic leh ṭul danga hman tur).

✓ Police Station tinah lirthei (LMV) thar pek vek a ni dawn. Hei vang hian Police outpost 15-in lirthei pakhat tal an dawng ang.

✓ Armed Police battalion te, specialized unit te, district executive force-te leh Police Training School hnenah lirthei pek a ni dawn.