Mizorama hmasawnna lian tham buaipui mek chungchang sawiho

Chief minister Lalduhoma hoin nimin khan CMO conference hall-ah Mizoram Pro-Active Governance and Timely Implementation (Mi-PRAGATI) an ṭhukhawm a; Mizorama hmasawnna lian tham buaipui mek chungchang an ngaihtuah.

Mi-PRAGATI hi hma-sawnna hna lian zualte vil a, harsatna an tawhte chinfel dan dappui tur leh a ṭul anga department hrang hrang thawhhona tichak tura din a ni.

Ṭhutkhawmah hian cheng vbc 44,800 vel sênga thawh tur Sairang rel chawlhhmun aṭanga Mizoram chhim tàwpa Myanmar ramri bul khua Hmawngbuchhuah thlenga rél kawng siam dan tura ruahmannate Railways aiawhte'n an sawifiah a; rél kawng chu km 224 vela thui, chawlhhmun (station) 20 awm tura duan a nih thu an tarlang.

Thenzawl rél chawlhhmun awmna tura rîruat tawh chu Thenzawl khua aṭanga a hlat deuh avangin Chief Minister-in hnai deuh zawka dah dan zawng turin Railways hotute a lo hrilh tawh a' nimina ṭhutkhawmah hian hnai deuh zawka dah an tum dan Railways hotute chuan an sawifiah.

NABARD RIDF sum hmanga Mizoram sorkar hnathawh mek, cheng nuai 300 aia tam senna tur project 53-te ennawnna neih a ni a; hna kal muang zualte kal muan chhan tarlan niin, chak zawka hna thawh dan tur sawi a ni.

Ropuiliani Tribal Freedom Fighter Museum sak mek chungchang te, State Tribal Institute sak mek te, PM SHRI hmalakna kal mek te, Swachh Bharat hmalakna te, Kaladan Multi Modal Transit Transport Project te, PWD hnuaia hna lian zuala hnathawh timuang thei harsatna an tawhte leh project kalpui lai zinga en zui ngai bikte an sawiho niin, harsatnate chinfel dan tur an sawiho bawk.

Sawihonaah hian Home minister K Sapdanga, Forest minister Lalthansanga, Supply minister B Lalchhanzova, PHE minister Prof. Lalnilawma bakah, chief secretary Khilli Ram Meena leh official pawimawh te, Mizorama project lian thawktu central agency-te an tel. Online-in Ministry of External Affairs aiawh te, NHIDCL Managing Director te, district bawrhsapte'n an zawm a ni.