Aizawlah lei laih khap a ni

Aizawl Municipal Corporation (AMC) chuan thupek tichhuakin, fûr laia leimin vanga chhiatna thleng thei laka inven nan Aizawl khawpui huam chhungah kumin July 1 - October 31 chhungin lei laih, leivûng hmanga khuar hnawh leh a kaihhnawihte khap a nih thu a puang.

AMC chuan, thupek bawhchhiate chu Mizoram Municipalities Act, 2007 hmanga hrem theih an nih thu a tarlang a, "Khapna kenkawh chhung hian chhiatna lian zawk a thlen lohna tura ṭul bik thilah phalna dil theih a ni ang. Ṭul bik thilah chuan a hmunhma dinhmun chiang taka tarlangin AMC-ah dilna thehluh theih a ni a, dilnate chu uluk taka enfiah tur niin, phalsak ngei ngei tur tihna a ni lo," a ti.