SIR 2026-ah voter 95.63% thun tawh

Mizorama Electoral Roll Special Intensive Revision (SIR) 2026 neih mekah enumeration form sem leh lak khawm zawh thawkhat a ni tawh a, Mizoram electoral roll hman meka voter zinga 95.63% chu Election Commission of India (ECI)-NET ah thun luh tawh niin, Champhai leh Serchhip district-ah digitisation zawh a ni tawh.

Mizoram electoral roll hman mekah voter 8,75,068 an awm a, chu'ng zinga 8,35,954 chu SIR 2026-ah hian nimin thleng khan ECI-NET ah thun luh (digitise) tawh niin, voter zawng zawng aṭangin 95.53% a tling. SIR thawh thumna neih mekna state zingah, ECI-NET a enumeration form thun luhah Mizoram a sang fál hle niin thunei­tute chuan an sawi.

Champhai district-ah chuan June 17, Nilaini zan dar 8 khan enumeration form zawng zawng digitise kim a ni. Champhai district-ah hian constituency pathum - Champhai North, Champhai South leh East Tuipui awmin, voter 58,846 an awm. Voter 58,846 aṭangin 56,450 (95.93%)-te enumeratoin form lak let a ni a, lak let theih loh 2,396 (4.07%) a awm.

Champhai South-ah voter 22,443 awmin, chung zinga 21,412-te Eenumeration form chu lak let theih a ni a, lak let zat hi 95.41% a ni. Champhai North-ah voter 20,435 a awm a, form 19,572 (95.78%) lak let niin, lak let theih loh 853 (4.22%) a awm. East Tuipui bialah voter 15,968 an awm a, form 15,466 (96.86%) lak let niin, lak let theih loh 502 (3.14%) a awm bawk.

Enumeration form pek chhuah, lak let theih tawh lohte chu - mahni vote neihna hmuna awm tawh lo (absent) te, insawn tawh te, thi tawhte leh awm nawn te an ni.

Serchhip district-ah pawh June 17 zan khan enumeration form digitisation zawh a ni a; district chhunga Assembly bial pathum Serchhip, Tuikum leh Hrangturzo bualah voter 55,389 an awm a, chu'ng zinga mi 1,184-te chu SIR 2026-ah hian ECI NET-ah thun an ni lo. ECI NET-a thun lohte chu - thi tawh te, chhui chhuah theih loh te, pêm hlen tawh te, hming chuang nawnte leh inziak lut duh lote an ni.