KHAWTHLIR

MST bus-a fimkhurna tur

Transport department chuan thuchhuah siamin, tunlai hian thil/bungraw thawnah fimkhurna tur tam tak a awm thu a tarlang. MST bus-a bungraw inthawnah a thawntu leh a dawngtu tur hming, address leh phone number chiang taka ziah lan tur a nih thu tarlangin, "A thawntu leh dawngtu tur nihna chiang taka ziah lan awm lo chu phurh tawh loh tur a ni," an ti a; driver leh conductor ten an phur lui a nih a, harsatna an tawh pawhin department-in a buaipui dawn lo tih an tarlang.

Heroin man

Mizoram Police leh Assam Rifles te chuan June 16, 2026 khan Keifang daiah hmeichhe pathum hnen aṭangin heroin gram 634 an man a, Saitual Police Station-ah thubuai ziah luh a ni.

TRC-in zirlai thlah

T Romana College chuan nimin khan Vaivakawn Cultural Center cum Auditorium-ah Graduation Dinner, Motivation & Valediction programme an hmang. Principal Dr Jenifer Lalbiakdiki'n inlawmna leh fuihna thu sawiin, zirlaite chu an hma hunah eng pawh awm se, Pathianin a dahna hmunah theihtawp chhuaha rinawm taka awm turin a chah. Zirlai chhuak tur mi 304 hnenah ngaihhruina hlan a ni a, zanriah an kilho. T Romana College hi kum 1992-ah din niin, NAAC 'B' grade a ni.

UNNATI zirho

Commerce, Industries, Geology & Mining department chuan nimin khan IPR conference hall-ah UNNATI 2024 chungchang zirhona an buatsaih. Sorkar laipuia Department for Promotion of Industry and Internal Trade team leader Rahul Saini chuan UNNATI scheme a sawifiah a; bank aiawh te, stakeholder-te leh mi pawimawh dangte telin, zawhna leh chhanna hunte hman a ni.

Centre tlawh

Lawngtlai DC Donny Lalruatsanga chuan nimin khan Lawngtlaia Gilead Drop-In Centre a tlawh a, thawktute nen an inkâwm. Donny Lalruatsanga chuan, mamawh an neihte zinga water filter chu pek an nih tur thu leh an harsatnate chu chinfelpui a tum thu a sawi.