Kum 3 chhungin bawngpui ṭha 1,000 lak luh tum a ni - Cooperation Minister

Mizoram State Cooperative Union (MSCU) chuan nimin khan Vanapa Hall-ah General Assembly vawi 37-na an hmang a, Coopera-tion minister PC Vanlalruata'n a hmanpui. Minister chuan, MULCO aṭanga bawnghnute thar tihpun nan kum thum chhungin bawngpui ṭha 1,000 lak luh tum a nih thu a sawi.

PC Vanlalruata chuan, central sorkarin bawnghnute thar tihpunna (White Revolution 2.0) a kalpui mek bawhzuina atan Mizoram sorkarin Mizoram Milk Producers’ Cooperative Union Limited (MULCO) leh National Dairy Development Board (NDDB) te chu thuthlung (MoU) an ziahpui thu a sawi a, "Inremna kaltlang hian bawngpui ṭha 1,000 tal kum thum chhunga lak luh a, MULCO-in bawnghnute a thar litre 15,000 chuanga a pun theih ngei beisei a ni," a ti.

MULCO tihchangtlunna atan cheng vbc 24.10 ruahman a nih thu sawiin Minister chuan, "Hei hi central sorkar tum tur vbc 16.78 leh Mizoram sorkar tum tur vbc 7.32 a ni," a ti a; Silk Samagra 2.0 hnuaia Integrated Muga Silk Development Project atan cheng vbc 5 pawm a nih tawh thu leh, Integrated Sericulture Post-processing Hub atan vbc 125 budget atan ruahmanna siama thehluh a nih thu a sawi.

Cooperation Minister chuan, cooperative society-te chu Mizoram hmel tidanglam a, state economy tiṭhang theitu an nih thu a sawi a, "Sorkarin cooperative society-te hmasawn zelna atan Mizoram Cooperative Joint Mission hnuaiah ‘profit-making cooperative society’ (hlawkna tel thei cooperative society) 1,000 tal din tura rawtna proposal Ministry of Cooperation-ah a thehlut tawh a, society tinte'n annual turnover rate cheng nuai 100 tal an neih theih kan beisei," a ti.

MSCU hi kum 1975 khan din a ni a, Mizorama cooperative society-te hnenah thil pawimawh chi hrang hrang zirtir tura din a ni.