Chhûl hmáwr cancer vênna damdawi pek tura ruahman zinga 99% pe tawh

State Task Force for Immunization chu nimin khan Secretariat conference hall-ah Health secretary K Lalrinzuali hoin an ṭhukhawm. Hmeichhia kum 14-15 inkarte hnena chhûl hmáwr cancer vênna damdawi (HPV vaccine) pek tura ruahman zinga 99% hnenah pek a nih tawh thu tarlan a ni.

Ṭhutkhawmah hian July 1, 2026-a Mizorama National Immunization Day hman turah hri danna pek dan tur leh kumina hmalaknate thlirho a ni. Tarlan danin, National Immunization Day atan hian Mizorama chenna-in 2,68,925 tuam a ni tawh a, kum 5 hnuai lam mi 1,02,823 an tel. Human Papilloma Virus (HPV) vaccine chu hmeichhia kum 14-25 inkar 10,351 hnena pek tum (target) chu 99% pek zawh tawh a ni a, Serchhip, Lawngtlai leh Siaha district-ah coverage a hniam.

Vaccine pek chungchanga harsatnate sawiho a ni a; fûr laia ruahtui tam vanga inkalpawh harsat vang te, thu belhchian dâwl lo thehdarh vanga vaccine hlau leh chhan dang hrang hrang vang a nih thu an sawi.

Zenghri (polio) bikah, India ram chu kum 2014 khan zenghri ûm bona ramah puan ni tawh mah se, zenghri la awmna Pakistan, Myanmar leh Bangladesh ten an hual avangin invenna damdawi pek (immunization programme) thlah theih a nih loh thu sawi a ni bawk.