W Bengal leh Telangana-te state din champha lawm

Governor Gen. Dr Vijay Kumar Singh hoin June 17, Nilaini khan Lok Bhavan-ah 'Ek Bharat Shreshtha Bharat' kaltlangin West Bengal leh Telangana state-te din champha lawm a ni.

Larsap chuan, India rama chêng hnam hrang hrang inkara inpumkhatna leh inunauna ṭha zawk a awm theih nan sorkar laipuiin Ek Bharat Shreshtha Bharat (One India, Great India) a duan thu a sawi a, "India ram hmun tinah ṭawng, hnam ziarâng, nunphung, incheina, ei leh in, sakhua leh thil dangah danglamna tam tak a awm a, kan danglamnate hi kan chakna thurûk a ni a, state dangte hnam ziarâng leh nunphungte zira hriat chian lehzual kan tum a pawimawh," a ti a; Mizo zirlaite chu hnam dang ṭawng thiam tum turin a chah.

Inkhawmah hian Telangana larsap Shiv Pratap Shukla thuchah ngaihthlak niin, state pahnihte chanchin tarlanna video thlirho a ni a; Mizoram University asst professor pahnih Dr Muttu Vemula leh Dr Arnab Roy ten state pahnih chanchin an sawi. MZU, Pachhunga University College, Centre for Disaster Management leh Synod Higher Secondary School zirlaite an tel a ni.

West Bengal hi June 20, 1947 khan state puitlingah hlan kai a ni a; Telangana chu India rama state naupang ber niin, June 2, 2014 khan Andhra Pradesh aṭanga indangin, state puitlingah hlankai a ni.