Mi dang dem hman a ni tawh lo, Hna kan thawk char char dawn - CM Zoramthanga

Zoramthanga chuan, 'Kih hnawk then hna in thawk dawn em?' tih zawhna a dawn thu sawiin, "Mi dang dem hman a ni tawh lo a, hna kan thawk char char dawn. A chhe lai siamṭhat char char a ngai a, kan hmasawnna hnathawh tur hi mi tin tan a ni a, political party dang pawh a huam ang. Pumpui tlang chhah leh a ríl phiar fatute'n an ei pawhin fatute chu kan thîk ngai lo a, kan duh ber ṭhin chu ruaiṭheh a ni," a ti a; Congress sorkar thil ṭha tihte an chhunzawm tur thu a sawi.

Kum 10 chhung eptu an nih chhungin hmachhawp eng emaw zat an siam tih sawiin CM Zorama chuan, "Campaign laiin SEDP-ah MNF inpe hmasa ber ang em tih zawhna a awm ṭhin. Chhan a har khawp mai. 'Pe bik lo ang' kan tih chuan campaign hah tak takte an lungawi loh a hlauhawm si, 'Pe hmasa ang' tih chuan mi dang an lungawi loh a hlauhawm thung. Neitu sorkar, mikhual sorkar ni lo kan nih avangin mipuite'n hmasawnna kan chang tlang dial dial ang," a ti.

Chief Minister chuan hmasawnna hna thawh tlan dial dial a nih tur thu sawiin, "Board system-in kan kal ang. Ngaihtuahtu a tam chuan ngaihtuahna a fing a, board chuan hnathawhte a en zui ang a, chu chuan eiruknate a veng dawn. Hmasawnna hnathawhnaah board hrang hrang kan siam turah hian tlawmngai pawl aiawh leh a ṭul chuan party dang a mite pawh kan telh ang. Kan vaiin kan hnatlang dawn a ni," a ti a; minister-te'n finchhuahtu ṭha an nei dawn tih a sawi.

Minister, secretary leh director-te an duh duha an kal ṭhin chu tihtawp a nih dawn tih sawiin Zoramthanga chuan, "Tun hmaa system hlui angin kan kal dawn lo. Village level, district leh state-ah mawhphurtu kan insiam rual dawn a, chu chu ram hmasawnna tur niin, corruption pawh a tawm-im ang. AMC pawh kan ti lian dawn a, thuneihna a tam thei ang berin an inṭâwm theihna tur a ding dawn," a ti.

Chief Minister chuan, sorkarna an siam hnua hnathawh hun an neihah hna an thawh char char chu thu sawiin, "Sorkar dawra zu zawrh zawng zawng kan khap a, hmun danga zawrh chu dan anga tihtawp a ngai. Budget session neih hunah zu zawrh tihtawpna tur kan pass ang. Tun dinhmunah chuan dry day kan puang a, dry day hi duh duh chen a puan theih," a ti a; zu khap chu dry day hmanga an kenkawh rih tur thu a sawi.

Kawngpui siam hna pawh an thawk nghal char char nia sawiin Zoramthanga chuan, "National Highway-54, Buichali leh Khamráng vel chhe lutuk pawh fûr lai pawha a kal hram hram theihna turin sum awm ang ang dap khawmin siam nghal a ni. Kawngpui siamṭhat zung zung a theih loh a, kum khat chuang a ngai. Mahse, a chhe zual lai chu a siam theih a, sum dap khawmin a chhe zual lai kan siam zel dawn. Kawr thar lei theih loh pawhin a ṭet tal bel kan tum a ni," a ti.

Zoramthanga chuan, 'Missionary nuai khat kan tír chhuak ang' tih a sawi chu nuihza siamna atana hman a nih thu sawiin, "Tunah hian sponsor leh sponsor loa missionary tirh chhuah zat hi 30,000 chuang an ni tawh," a ti a; chung tinin malsawmna a nuai tél an dawn hunah chuan missionary chu nuai khat aia tam tirh chhuah theih a ni dawn niin a sawi a ni.