SWMC-ah LC 19-in bawlhhlawh paih mek LC dang 38 paihtir tuma hmalak mek a ni

Aizawl bawlhhlawh sâwngbàwlna thar, Solid Waste Management Centre (SWMC)-ah Aizawl khawpuia veng (local council) 19-in bawlhhlawh an paih mek a, veng dang 38-te paihtir tuma hmalak leh mek a ni. AMC hotute chuan, Aizawl mipuite chu bawlhhlawh ṭawih thei leh ṭawih thei lote uluk leh fimkhur taka thliar ngei turin an chah.

Aizawl Municipal Corporation (AMC) mayor PC Lalhmingthanga chuan Vanglaini palai zawhna chhangin, SWMC-ah tunah hian veng 19-a bawlhhlawhte sawngbawl tura paih mek a nih thu a sawi a, "February 19, 2020 aṭangin veng (LC) dang 38-te paihtir ṭan leh tum a ni a, chu'ng veng 38-a LC member-te chu bialtu councillor-te'n tunlai hian ko khawmin, bawlhhlawh thliar dan tur leh thliar ngei a ṭul­nate an zirtir mek a ni," a ti.

PC Lalhmingthanga chuan, SWMC-ah chuan Aizawla local council zawng zawng (LC 83)-a bawlhhlawhte paih thuai theih an duh tih a sawi rualin, "SWMC-in a dâwl zawh chin enchhin zel chunga paih a ngai a, chuvang chuan vawi leh khatah Aizawla bawlhhlawh zawng zawng lâk luh nghal a remchang lo. February thla aṭangin Aizawla veng 38-a bawlhhlawhte paihtir leh phawt tum a ni," a ti a; SWMC dinhmun azirin a bâk veng dang 26 pawh paihtir theih thuai an beisei thu a sawi.

Aizawl Mayor chuan, bawlhhlawhte chu paih satliah ni loin, sâwngbâwl turin SWMC-ah dah luh a nih tâk avangin bawlhhlawhte chu a ṭawih thei leh ṭawih thei lote ṭha taka thliar ngei a ngaih tawh thu a sawi a, "Tunah hian SWMC-a bawlhhlawh paih tawh vengah pawh bawlhhlawh la thliar ṭha lo tam tak an awm a, nasa taka inzirtir a la ngai. SWMC hman hma, dumping ground-a paih a nih lai, nikum lam aṭanga bawlhhlawh thliar kan tih pawh kha mipuiin an lo thiam lâwk theih nan a ni," a ti.