Vawiinah Mizoramah total bandh Bandh hi 100%-in kan thláwp - CM

North East Student Organisation (NESO) bultumin vawiin hian India hmarchhak state zawng zawnga The Citizenship (Amendment) Bill, 2016 duh lohzia lantirna atan total bandh an huaihawt dawn a, Mizoramah pawh huaihawt a ni dawn. Total bandh huaihawt tur chu MNF-in 100%-a an thlàwp thu chief minister Zoram­thanga'n a sawi.

Chief Minister hian nimina Mizo Hnam Rûna inkhawmah thu a sawinaah, "The Citizen­ship (Amendment) Bill hi ram dang aṭanga lo lutte awlsam tak leh rang taka citizen an nihna tur a ni a, hmân aṭangin kan hnial a, ṭha kan ti lo. Bill duh lohna hi zaa zain kan thlawp. Zirlaite'n duh lohna an lantir hi hlawhtling ngei se tih hi kan duh dan a ni," a ti.

Total bandh hi Mizo­ramah chuan zing dar 5 aṭanga tlai dar 4 thleng huaihawt a ni dawn a; chanchinbumi, chanchinbu sem, venhim­na hna thawktute (police), PHE tui sem, damdawi-ina thawk, bawnghnute sem leh Power & Elec­trict department-a emer­gency-a hna thawkte erawh a huam dawn lo.

MZP-in ruahmanna an siam danin, Aizawlah chuan Kulikawn, Sikul­kpuikawn, Treasury Squre, Khatla kâwn, Tennis Court, Temple Squre, Vaivakawn, Hunthar Veng Company Pêng, Bawngkawn, Zemabawk, Chaltlang Dawrkawn, Ramhlun Industry Pêng, Chanmari kâwn, Zarkawt kâwn, Bazar Bungkawn leh College Vengahte duty indah an tum.

Lungleiah chuan Hrangchalkawn, AOC Square Ramthar, Chan­mari, Venglai, Rahsi Veng, Bazar Veng leh Zo­tlangahte duty an indah dawn a; hriat theih chinah, Lawngtlaiah erawh chuan bandh huaihawt a ni dawn lo. Total bandh huaihawt tur chungchangah hian Lai Students' Association chuan NESO leh MZP aṭangin hriattirna leh ngenna an dawng lo nia thu dawn a ni.

NESO chuan The Citizenship (Amendment) Bill, 2016 chu pawm a nih chuan Afghanistan, Bangladesh leh Pakistan aṭanga India rama lo lut Hindu, Sikh, Buddhist, Jain, Persi-te chu kum ruk chhung India rama an awm tawh chuan India khua leh tui nihna pek tur a nih avangin an duh lo a ni.