Zoram Peoples' Movement-in Mipui Buhzêma thawh zel turin mipui sáwm

Zoram Peoples' Movement (ZPM) senior vice chairman F Rodingliana chuan, Mizoram inthlanpuiah hun chêp tak kara candidate tur mi ṭha tak tak Pathianin a pe chu lawm­awm an tih thu a sawi a; ZPM hmanga mipui buhzém an buatsaih chu kawng tam takah an awlsam phah thu a sawi rualin, Mipui Buhzêmah thawh zel turin mipui a sáwm.

F Rodingliana hian nimin khan Aizawl Press Club-ah thuthar thehdarhtute a kâwm a; inthlanpuiah kalphung thara kal kan tumna chu tihpuitlin theih a ni ta rih lo tih sawiin, "Kalphung hlui leh thar thliara kan inhambuai em em laiin, inthlanin min nangching ta si a, pawl thar kan nih avangin politics-a hmingchhiatna nei lo mi ṭha dap khawm a lo ngai a, thil har tak mai a ni. Hun chêp tak karah candidate tur mi ṭha tak tak Pathianin min pe hi kan lawm hle," a ti.

Mite angin hun leh sum ngah tâwk loh avangin mi beisei ang phak zo lo mah se, ZPM - Mipui Buhzem an buatsaih chu kawng tam takah an awlsam phah tih sawiin F Rodingliana chuan, "Mipui thinlungah candidate-te puih duhna thinlung kan tuh hi kan hlawhtlinna pakhat niin kan hria," a ti a; ZPM tana ṭhahnemngaite chu ZPM Mipui Buhzemah thawh zel turin a ngen.

ZPM Sr. Vice Chairman chuan, ZPM candidate-te'n bial vilna tur sum an neih ang tâwk tâwk local steering committee kutah an pe ve a, an candidate-te chu sum nei tam ve lo an nih avangin renchem leh fimkhur takin an hmang tih a sawi a, "Kan candidate-te sum dah an hman bâng nuai tél te, sing télte ṭawngṭaina nena an pe let leh vek tih hriat hian, sorkarpui la lo mah i la mipui thinlung chu kan lain kan inhria," a ti.

Kalphung thar chu ZPM candidate tam takin tlakpui mah se, inthlan leh hunah chuan sorkarna an siam theih ngei tawh an beisei thu sawiin F Rodingliana chuan, "Pathian leh Zoram hmangaihtute zarah dikna leh rinawmna hi kan dinchhuahpui ngei kan inbeisei a ni," a ti a; ZPM chu chak zawka an kal zel dawn thu a sawi.

Inthlanna tluang taka nei a, sorkar thar a awm ta chu lawm­awm an tih thu sawiin Ro­dingliana chuan, "Hun laklawha rorel tura Pathian ruat ni-ah kan ngai," a ti. Kawng chhâwng leh traffic jam awm lo Aizawl chu mipuiin an nghahhlelh tawh thu sawiin, "Kawng chhâwng kan neih hma pawh hian sorkar hmasain ruahmanna mumal awm miah loa motor intlân chhâwk an rawt hi min sûtsak turin kan ngen a ni," a ti.

ZPM Sr. Vice Chairman sawi danin, motor intlân chhâwk ṭan tirh lamah chuan traffic jam a tiziaawm ngei a, October 2017 aṭanga December 2018 thleng khan zing dar 8.30 aṭanga tlai dar 6 inkarah chawhrualin darkar khatah private motor 295-in hmar lam an pan anga chhut a ni a, motor 359 chhim lam panin an tlan thei anga chhût a ni.

October 2018-ah erawh chuan darkar khatah motor 251 pawh an tlan leh thei tawh lo; a chhan chu - ruahmanna mumal a awm loh avangin mi hausa zawkte'n motor an lei belh nasat vang a ni. Mizoramah kum danga kum khata motor 5,000 - 9,000 vela pung ṭhin chu Aizawla motor intlân chhâwk hnuah, kum khat leh thla hnih chhungin motor 19,454-in a pung hman a ni.