Hmasawn zel turin IPR leh MJA chah

Information & Public Relations department chuan, nimin khan an directorate auditorium-ah kum thar inhlan tharna inkhawm an buatsaih a; IPR minister Lalruatkima leh MJA member-te'n an hmanpui. Minister chuan, IPR department-a thawkte leh MJA member-te chu thlen chin aṭanga hmasawn zel turin a chah.

IPR Minister chuan, "Thlen chin aṭanga hma­sawn zel tur kan ni a, mipui leh chanchinbu aṭangtein hmasawnna pakhat tal neih tum ila, kum thar hian malsawmna min thlen se la. Ram leh khawtlang hmasawnna tur te, sorkarin ruahmmanna a siamte tipuitling turin theihtawp chhuahin kan ṭang tlang dawn a ni," a ti a; IPR chuan minister fel tak tak an nei tawh ṭhin tih sawiin, IPR department leh journalist-te tana hmalakna chhunzawm tur awmte chu an chhunzawm zel dawn thu a sawi.

Lalruatkima chuan, IPR department chu an pawimawh hle a, sorkar policy-te mipui hnena hriattirtu an nih thu a sawi a; press release siamnaah leh journalist-te'n chan­chin thar an ziahnaah ṭawngkam chheh sual a hlauhawm thu sawiin, "Media tan Mizo ṭawng hman danah fimkhur a ngai a, hmasawn zel a pawimawh. Mizo ṭawng humhalhtu tur kan ni a, keini aia humhalhtu ṭha an awm lo. Ṭawng humhalh kawngah a sûl sutu, a bul tumtu kan ni," a ti.

IPR department hma­chhawp, Lianchhiari Rûn sak tur atan theihtawp chhuah a nih tur thu sawiin Lalruatkima chuan, "MJA Press Enclave atan pawh theihtawp kan chhuah zel ang," a ti a; chanchinbua advertisement rate tihsan a nih theih nan hmalak zel a nih tur thu leh hotute nen an la sawi tlan tur thu a sawi. 

Lalruatkima chuan, chanchinbumite leh IPR officer-te tan Parliament-ah training neih theih dan a awm chuan hmalak a nih tur thu leh, a personal secretary hnenah Assembly Secretariat-a lo bawhzui tura a tih tawh thu a sawi a; chanchinbumite tan financial year 2018-19 kal mek chhungin press tour buatsaih a nih tur thu a sawi bawk.

Inkhawm hi IPR direc­tor David L Thang­liana'n a kaihruai a; MJA president Zonunsanga Khiangte pawhin thu sawiin, Mi­zorama journalist-te mamawh hrang hrangte a sawi lang a ni.

Kum 2018 chhunga IPR department staff thi mi pali - Zomuana, Lalrozuala, Lalruatsanga leh Kissan Thapa te leh, MJA member thi C Thanmawia, Kolasib-te sûnna hun hman a ni bawk.