MJA member-te'n AI an zirho

Mizoram Journalists' Association (MJA) Gen. Hqrs chuan nimin khan Aizawl Press Club-ah artifical intelligence (AI) leh Mizoram Journalists' Welfare Scheme (MJWS) chungchang zirhona an buatsaih.

Zirhona hi MJA vice president C Lalhmachhuana'n a kaihruai a, MJA president Vanlalrema Vantawl-in AI zirhona leh MJWS inhrilhfiahna hun buatsaih chhan a sawifiah. Resource person Adam Saprinsanga, The Frontier Despatch editor-in AI chungchang leh hman ṭangkai theih dante MJA member-te a zirtir a, a taka tih chhin nghal zel a ni.

MJA President chuan, AI chu mi tam takin an hman ṭangkai tawh avangin media khawvel pawh nasa takin a inthlak mek thu a sawi a, "AI hi kan hmelma a ni lo a, kan hna tiawlsamtu tur a ni a, journalist-te hi kan hna leh AI a inkaihhnawih avangin a hmang ṭangkai thei bertu tur kan ni," a ti.

AI thil tih chhuahte chu a dik vek lo tih sawiin Vanlalrema Vantawl chuan, "Zaa za a dik bik lo a, rin dan tawk kan thiam a ngai. AI-a innghah lutuk hian thluak a tichâwl thei a, hman dan tâwk thiam a ṭul," a ti a; mihringa theihna leh thiamna tiṭhuanawptu atan hmang lo turin AI hman dan tawk thiam a ṭul thu a sawi.

Resource person Adam Saprinsanga chuan, journalism leh media chu mawhphurhna nei a nih thu sawiin, AI hmanga thlalak leh video siamte chu AI hmanga siam a ni tih tarlan tel zel a ṭha a, a him thu a sawi a ni.