NQAS national certification hmu thar

Sorkar damdawi-in ṭha tehna, National Quality Assurance Standards (NQAS)-ah Lengpui Community Health Centre, Upper Republic leh Electric Venga health & wellness centre (sub-centre) te an tling thar.

NQAS endiknaah Lengpui CHC chuan 97.59% a hmu a, Electric Veng HWC-in 84.10% leh Upper Republic HWC-in 81.08% an hmu thung a; NQAS national certification an hmu a ni.

Heti hian Mizorama sorkar damdawi-in 119-in NQAS national certification an hmu tawh a; sorkar damdawi-in 47 (HWC 40 telin)-in NQAS state certificate nei tawh bawkin, national certification hmu turin endik an dil mek.

NQAS national certification hmu tur hian endikna chhawng thum paltlang a ngai a; a tawp bera endikna chu National External Assessment niin, chutah chuan tehnaah 70% an hmuh tlin chuan national certification an hmu thei a ni.