Lunglei MZP leh HM an inkâwm; Police quarters chhiat thu an thlen

Nimin khan MZP Headquarters, Lunglei hruaitute chuan Lungleia châm mek Home minister K Sapdanga chu LMC pisaah an kâwm a; AP Tlang leh Ṭhuamluaia Mual panna bula police quarters-te a chhiat tawh thu leh luah tlak tawh loh a tam thu an hrilh.

Home Minister chuan, police quarters eng emaw zat luah tlak loh khawpa chhia chungchang zirlai hruaitute thlenga an vei tlâng chu lawmawm a tih thu a sawi a, "Sak ṭhatna tur hi Finance department-ah dil mek a ni a, fund awm veleha khawih tura ruahman a ni," a ti a, tunah chuan nghah rih a la ngaih thu a sawi.

Lunglei MZP hruaitute chuan, District Jail, Lunglei sak ṭhat mek chungchang pawh Home Minister an sawipui a, a hun taka zawh theih ngei ni se an duh thu an thlen a ni.

District Jail sak mek enkawltu Lunglei West bialtu MLA T Lalhlimpuia chuan, hnathawh mek chu chak taka kalpui a nih thu leh a hun taka zawh tum a nih thu a sawi rualin, hna belh hlek hlek a awm avangin a hun taka zawh hman loh palh a awm theih thu a sawi.